ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫ.އެން.އެފް.ސީ.ސީ.ސީ)ގެ 29 ވަނަ ކޮންފަރެންސް އޮފް ދަ ޕާޓީސް (ކޮޕް29) ގައި ބައިވެރިވެވަޑައިގަތުމަށް ކުރެއްވި ދަތުރުފުޅަށްފަހު، އަޒަރުބައިޖާންގެ ބާކޫއިން ފުރާވަޑައިގެންފިއެވެ.
ދުނިޔޭގެ އެކި ކަންކޮޅުތަކުން އެތައް ގައުމެއްގެ ލީޑަރުންނާއި، ތިމާވެށީގެ ތަޖުރިބާކާރުންނާއި އެކްޓިވިސްޓުންގެ ބައިވެރިވުން ފެނިގެންދިޔަ ކޮޕް29ގެ ބައިނަލްއަގުވާމީ ޕޯޑިއަމްގައި ވާހަކަފުޅުދައްކަވަމުން ރައީސް ވަނީ، މޫސުމަށް އަންނަ ނޭދެވޭ ބަދަލުތަކުގެ ނުރައްކާ އެންމެ ބޮޑު ގައުމުތަކަށް އަމާޒުވާގޮތަށް ވަޢުދުތައް ބަދަލުކުރެއްވުމަށް ބައިނަލްއަގްވާމީ މުޖުތަމައަށް ގޮވާލައްވާފައެވެ.
ރައީސްގެ ވާހަކަފުޅުގައި، ދިވެހިރާއްޖެއަކީ ބިންތިރި ޖަޒީރާ ގައުމަކަށް ވާއިރު، ރާއްޖެއަށް ކުރިމަތިވެފައިވާ ގޮންޖެހުންތަކުގެ މައްޗަށް އަލިއަޅުއްވާލައްވައި، ހޫނުމިން އުފުލޭ މިންވަރު ދަށްކުރުމަށާއި، މޫސުމީ ނޭދެވޭ ބަދަލުތަކަށް އަހުލުވެރިކުރުވުމުގެ މަސައްކަތްތަކަށް އެއްބާރުލުން ދިނުމަށްޓަކައި ބައިނަލްއަޤްވާމީ ފެންވަރުގައި އަޅަންޖެހޭ ފިޔަވަޅުތަކުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.
މީގެއިތުރުން ކޮޕް29ގެ ހަވާސާގައި އެމަނިކުފާނު ވަނީ ދުނިޔޭގެ ބައެއް ލީޑަރުންނާއެކު މަތީ ފަންތީގެ ބައްދަލުވުންތަކުގައި ބައިވެރިވެވަޑައިގެން، ދޭދޭ މަސްލަހަތު ހިމެނޭ ދާއިރާތައް ކުރިއެރުވުމާ ބެހޭގޮތުން މަޝްވަރާކުރައްވައި، މޫސުމަށް އަންނަ ނޭދެވޭ ބަދަލުތަކުން އަރައިގަތުމަށް ބައިނަލްއަގްވާމީ ފެންވަރުގައި ކުރެވެމުންދާ މަސައްކަތްތައް ހަރުދަނާކުރުމަށް ވަކާލާތު ކުރައްވާފައެވެ.
މި މަޝްވަރާތަކުގެ މައިގަނޑު މަގްސަދަކީ ކުރިމަތިވަމުންދާ ގޮންޖެހުންތަކުން އަރައިގަތުމަށް ގުޅިގެން މަސައްކަތްކުރެވޭނެ ގޮތްތައްހޯދުމާއި، މޫސުމީ ލަނޑުދަނޑިތައް ހާސިލުކުރުމަށް ބޭނުންވާ ވަސީލަތްތައް ގައުމުތަކުގެމެދުގައި ހިއްސާކޮށް، ބަދަލުކުރުމުގައި އެއްބަޔަކު އަނެއްބަޔަކަށްދޭ އެއްބާރުލުން އިތުރުކުރުމެވެ.
މީގެ އިތުރުން ރައީސް ވަނީ މޫސުމީ ނޭދެވޭ ބަދަލުތަކާ ދެކޮޅަށް ދިވެހިރާއްޖެއިން ކުރަމުންދާ ބުރަ، އަދި ގިނަގުނަ މަސައްކަތްތަކާބެހޭ މައުލޫމާތު ބައިނަލްއަގުވާމި މުޖުތަމައުއާއި ހިއްސާކުރައްވައި، ދެމެހެއްޓެނިވި ތަރައްގީއަށް ރާއްޖެއިން ކުރަމުން ގެންދާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
ރައީސް ދެއްކެވި ވާހަކަފުޅުގައި، ރާއްޖެއާއި ތަރައްޤީވަމުން އަންނަ ކުދިޖަޒީރާ އެހެން ޤައުމުތަކުގެ ތަރައްގީގެ ލަނޑުދަނޑިތައް ހާސިލުކުރުމުގައި، ހާއްސަކޮށް، އިޢާދަކުރަނިވި ހަކަތައާއި، މޫސުމަށް އަންނަ ނޭދެވޭ ބަދަލުތަކާއި، ވިލުންވެރިކަން އިތުރުކުރުމުގެ މަސައްކަތްތަކުގައި އެހީތެރިކަން ފޯރުކޮށްދިނުމަށްޓަކައި ހަރުދަނާ މާލީ އަދި ފަންނީ އެހީތެރިކަން ބޭނުންވާކަން ތަކުރާރުކުރެއްވިއެވެ.
ރައީސުލްޖުމްހޫރިއްޔާ، ކޮޕް29އަށް ކުރެއްވި މި ރަސްމީ ދަތުރުފުޅުގެ ސަބަބުން، މޫސުމަށް އަންނަ ނޭދެވޭ ބަދަލުތަކާ ގުޅިގެން ބައިނަލްއަގުވާމީ މައިދާނުގައި ރައީސް އިސްކޮށް ހުންނަވައިގެން، ތަރައްގީވަމުން އަންނަ ކުދިޖަޒީރާ ގައުމުތަކާއި ތަރައްގީވަމުން އަންނަ އެހެން ގައުމުތަކަށް މިހާރުން މިހާރަށް ބޭނުންވާ، އަދި ދުރު ރާސްތާގެ ބޭނުންތަކަށް ހައްލު ހޯދައިދެނިވި ސިޔާސަތުތަކަށް ވަކާލާތު ކުރައްވާކަން ކަށަވަރުވެގެންދެއެވެ.
