ރާއްޖޭގެ އެކި ހިސާބުތަކަށް ބޮޑުބަޔަކަށް ވިއްސާރަކުރުމާއެކު ގުރުރާނެ ކަމަށާއި ބައެއް ހިސާބުތަކަށް ބޯކޮށް ވާރޭ ވެހޭނެ ކަމަށް ލަފާކޮށް އެ ކަމަށް ސަމާލު ވުމަށް މޯލްޑިވްސް މީޓިއޮރޮލިޖިކަލް ސަރވިސް(މެޓް)އިން އިލްތިމާސް ކޮށްފިއެވެ.
މީގެއިތުރުން މެޓުން ވަނީ މޫސުން ގޯސްވެ ރާއްޖޭގެ ބައެއް އަތޮޅުތަކަަށް ރޭގެ ދަންވަރު 3:30 ހަމައަށް ހުދުސަމާލުވެސް ނެރެފައެވެ. މި ހުދު ސަމާލު ނެރެފައިވަނީ އދ. އަތޮޅާ ހަމައަށެވެ.
މި ހުދު ސަމާލުގައި އެ ހިސާބުތަކަށް ބޯކޮށް ވާރޭވެހުމާއެކު ގުގުރާނެ ކަމަށް މެޓުން ބުނެފައިވެއެވެ.
މެޓުން ބުނީ ހުޅަނގާއި ހުޅަނގުއުތުރުން ދެކުނުގެ އަތޮޅުތަކަށް ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި އެހެން ހިސާބުތަކަށް ވައި އެނބުރި އާންމުގޮތެއްގައި މަޑުން، އުތުރާއި އިރުއުތުރުން ގަޑިއަކު 3 މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު ގާތް ގަނޑަކަށް 35 މޭލު ބާރުމިނުގައި ވައި ގަދަވުން އެކަށީގެން ވާ ކަމަށްވެސް މެޓުން ބުންޏެވެ.
މީގެއިތުރުން މެޓުން ބުނީ ރާއްޖޭގެ ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި ގަދަވާނެ ކަމަށެވެ.
އުތުރާއި މެދުރާއްޖެތެރޭގެ ރާޅުގެ އުސްމިން ހުންނާނީ 2 ފޫޓާއި 4 ފޫޓާ ދެމެދުއެވެ. އަދި ދެކުނުގެ އަތޮޅުތަކަށް ރާޅުގެ އުސްމިން ހުންނާނީ 3 ފޫޓާއި 6 ފޫޓެވެ.
