އެންޓީރިއަރ ކްރޫޝިއޭޓް ލިގަމަންޓް (އޭސީއެލް) އަނިޔާއަކީ ކަކުލު ސްޓޭބަލައިޒްކޮށްދޭ މުހިންމު ޓިޝޫއެއް ކަމުގައިވާ، ފަލަމަސްގަނޑާއި ކަށިމަތީ ކަށިގަނޑު ގުޅުވައިދޭ ޓިޝޫ ވީދުމެއް ނުވަތަ ރެނދުލާގޮތްވުމެވެ.
މިފަދަ އަނިޔާތައް އާންމުކޮށް ވަނީ ކުއްލިއަކަށް ހުއްޓުމާއި، އެނބުރުމާއި، ނުވަތަ ފުންމުން ހިމެނޭ ކުޅިވަރުތަކުގައެވެ. މިސާލަކަށް ބާސްކެޓްބޯޅަ، ފުޓްބޯޅަ އަދި ސްކީކުރުން ފަދަ ކުޅިވަރުތަކުގައެވެ.
އޭސީއެލް އަނިޔާއެއް ވެއްޖެކަން އާންމުކޮށް އެނގެނީ އަޑުގަދަ "ޕޮޕް" އަޑެއް އިވުމާއެކު، ވަރުގަދަ ރިހުމަކާއި، ކަކުލު ދުޅަވުމާއި، ބެލެންސުވާން އުނދަގޫވުމާއި، އަދި ބަރު އުފުލަން އުނދަގޫވުމުންނެވެ. މިފަދަ އަލާމާތްތަކެއް ފެނިއްޖެނަމަ، ރަނގަޅަށް ޑައިގްނޯޒްކޮށް ފަރުވާ ދިނުމަށްޓަކައި ވަގުތުން މެޑިކަލް އެހީތެރިކަން ހޯދުމަކީ ވަރަށް މުހިންމު ކަމެކެވެ.
އޭސީއެލް އަނިޔާތަކުގެ ތެރޭގައި ކުޑަކޮށް އެ ޓިޝޫ ދެމުމުން ފެށިގެން ލިގަމަންޓް މުޅިން ވީދިގެން ދިއުން ހިމެނެއެވެ. މިފަދަ އަނިޔާތައް ވަނީ ކުއްލިއަކަށް ދުވުމުގެ މިސްރާބު ބަދަލުކުރުމުން، ރަނގަޅު ނޫން ގޮތަކަށް ވެއްޓުން ނުވަތަ ވެއްޓެން އުޅުން، ނުވަތަ ޓެކަލްކުރުމުން، މިސާލަކަށް ފުޓްބޯޅަ ކުޅުމުގައި ޓެކްލްކުރުމުންނެވެ. މިކަމަށް މަގުފަހިވާ ކަންތައްތަކުގެ ތެރޭގައި ރަނގަޅު ނޫން ގޮތްގޮތަށް ކަންކަން ކުރުމާއި، ރަނގަޅަށް ފިޓުނުވާ އާލާތްތައް ބޭނުންކުރުމާއި، އަދި އާޓިފިޝަލް ޓަރފްގައި ކުޅުން ހިމެނެއެވެ. އަންހެނުންނަށް އޭސީއެލް އަނިޔާތައް ވުމުގެ ފުރުސަތު ބޮޑެވެ. އެއީ ހަށިގަނޑުގެ ބައްޓަމާއި ހޯމޯން ތަފާތުވުމުގެ ސަބަބުންނެވެ.
ފަރުވާ ދެވެނީ އަނިޔާގެ ބޮޑު ކުޑަމިނަށް ބަލައިގެންނެވެ. ކުޑަކޮށް އަނިޔާވެފައިވާ ހާލަތްތަކުގައި އަރާމުކުރުމާއި ރީހެބިލިޓޭޝަން މެދުވެރިކޮށް ކަކުލުގެ ބާރާއި ސްޓެބިލިޓީ އަނބުރާ ގެނައުމަށް މަސައްކަތްކުރެވިދާނެއެވެ. ބޮޑަށް ވީދިފައިވާ ހާލަތްތަކުގައި ގިނަފަހަރަށް ސަރޖަރީ މެދުވެރިކޮށް އަލުން އެތަން ހަދައި، އޭގެ ފަހުން ފިޒިކަލް ތެރަޕީ ކުރަންޖެހެއެވެ. ފަރުވާ ކޮންމެ ގޮތަކަށް ދިން ނަމަވެސް، އޭސީއެލް އަނިޔާ ލިބިފައިވާ މީހުންނަށް ކަކުލުގައި އޮސްޓިއޯއާތްރައިޓިސް ޖެހުމުގެ ފުރުސަތު ބޮޑެވެ.
ރައްކާތެރިވުމުގެ ސްޓްރެޓެޖީތައް އަމާޒުކުރެވިފައި ވަނީ ފައިގެ، އުނަގަނޑުގެ، އަދި ބަނޑު ނުވަތަ ކޯރގަ ހުންނަ މަސްތައް ވަރުގަދަކުރުމަށާއި، ފުންމުމާއި ބިންމައްޗަށް ފައިޖެހުމުގެ ޓެކްނިކްތައް ރަނގަޅުކުރުމަށާއި، އަދި ރަނގަޅު ކުޅިވަރު އާލާތްތައް ބޭނުންކުރުމަށެވެ. މިސާލަކަށް، ސްކީ ބައިންޑިންގްތައް ރަނގަޅަށް ދޫވާކަން ކަށަވަރުކުރުމުން އަނިޔާތަކުން ސަލާމަތްވެވިދާނެއެވެ. ތަޖުރިބާކާރުން ލަފާދެނީ ޚާއްޞަކޮށް އަންހެން ކުޅުންތެރިންނަށް، ރިސްކު ކުޑަކުރުޑަކުރުމަށް ޚާއްޞަކޮށްފައިވާ ތަމްރީނު ޕްރޮގްރާމްތަކެއް ބޭނުންކުރުމަށެވެ.
ރަނގަޅު ޓެކްނިކްތަކާއި ތަމްރީނުތައް ބޭނުންކުރުމުން، ކުޅުންތެރިންނަށް އޭސީއެލް އަނިޔާތައް ވުމުގެ ފުރުސަތު ވަރަށް ބޮޑަށް ކުޑަކުރެވި، ރައްކާތެރިކަމާއެކު ހަރަކާތްތެރިވެ އުޅެވިދާނެއެވެ.
މަޢުލޫމާތު: މޭޔޯ ކްލިނިކް
