މީސްތަކުން މާއްދީ ތަކެއްޗަށް ނަޒަރު ހިންގައި ބަލައި އުޅެއެވެ. މުއުމިނުން އެއިން ކޮންމެ އެއްޗަކުން ﷲ ސުބްޙާނަހޫ ވަތަޢާލާ ދެކޭނެއެވެ. މީސްތަކުން މާއްދީ ތަކެތީގައި އަޅައިގަނެގެން އުޅެގެންފަތެވެ. މުއުމިނުން އެ ތަކެތި ފަސްދީ ގޮސް ﷲ ގެ ވުޖޫދާ ގުޅިގެންފަތެވެ.
ގަހުން ވަކި ވެގެން މޭވާ ބިމަށް ވެއްޓޭތަން ވަރަށް ގިނަ މީހުން ދެކެއެވެ. އެކަމަކު ގަހަކުން މޭވާއެއް ވެއްޓޭތަން ދެކެފައި ބިމަށް ދަމާ ބާރު (ގްރެވިޓީ) ދެނެގަތީ ނިވްޓަންއެވެ. މާއްދާ (މެޓަރ) އަކީ އެންމެން ދެކޭ އެއްޗެކެވެ. އެކަމަކު މާއްދާގައި އެކުލެވިފައިވާ އިލެކްޓްރޯންގެ ޙަރަކާތްތައް ފެނުނީ މައިކަލް ފެރެޑޭ އަށެވެ. ޒައްރާ (އެޓޮމް) އަކީ ހުރިހައި ތަނެއްގައިވެސް ހުންނަ އެއްޗެކެވެ. އެހެން ނަމަވެސް ޒައްރާގައި ހުންނަ ޖަވްހަރީ ބާރު (ނިއުކްލިއަރ ފޯރސް) ދެނެގަތީ އައިންސްޓައިންއެވެ. މި ބީދައިން އިންސާނާއަށް ދުނިޔޭގައި ލެއްވިހައި އެއްޗެއް އެބަ ފެނެއެވެ. އެކަމަކު އެ އެއްޗެހީގެ ތެރެއިން ﷲ ގެ ކުޅަދުންވަންތަކަމާއި، ރަޙްމަތް ދެކޭނީ މުއުމިނެކެވެ.
ބައިބްލް ގައި ވެއެވެ. “އަޑު އަހާނޭ ކަންފަތެއް ލިބިފައިވާ މީހަކު ނަމަ އަހާށެވެ. މި ނަސްލުގެ މީހުންގެ ތެރެއިން އަހަރެން ރުހޭ ބަޔަކު ކަނޑައަޅާނީ ކިހިނެއް ހެއްޔެވެ؟ މިއީ ބާޒާރު މަތީގައި ތިބެގެން އެމީހުންގެ ބައިވެރީންނަށް ގޮވާ ކުޑަކުދީން ފަދަ ބައެކެވެ. (އެމީހުން ގޮވައެވެ.) އަހަރެމެން ކަލޭމެންނަށްޓަކައި އޮނު ފުމުނީމެވެ. އެކަމަކު ކަލޭމެންނެއް ނުއެއް ނެށިއެވެ. އަހަރެމެން ކަލޭމެންނަށްޓަކައި ހިތާމަ ފައުޅު ކުރީމެވެ. އެކަމަކު ކަލޭމެންނެއް ނުއެއް ރުޔެވެ.”
ﷲ ތަޢާލާ ކެނޑިނޭޅި އެކަލާނގެ “އޮނު” އެބަ ފުންމަވައެވެ. އެއީ އެ “އޮނު”ގެ އަޑު އެހުމަށް ފަހު އިންސާނުން އޭގެ ރާގަށް ނެށުމަށެވެ. އެކަމަކު އިންސާނާ އެ “އޮނު”ގެ އަޑުގެ ތެރޭގައި ޣާފުލު ވެގެން އުޅެތެވެ. ﷲ މި ދުނިޔޭގައި އެކަލާނގެ ކުޅަދުންވަންތަކަމުގެ އެތައް ނަމޫނާއެއް އެބަ ދައްކަވައެވެ. އެއިން ކަމެއް ފެނުމާއެކު ތެޅިގަންނާން ޖެހެއެވެ. އެ ކަންތައްތަކާ އިންސާނާ ބައްދަލު ކުރާން ޖެހެނީ ކަރުނަޔާ އެކީގައެވެ. އެކަމަަކު އިންސާނާގެ އަނިޔާވެރިކަން ނިކަން ބައްލަވާށެވެ. ތެޅިގަންނާން ޖެހޭ ފަދަ ކަމެއް ފެނުނީމާ ތެޅިއެއް ނުގަނެއެވެ. ރޯން ޖެހޭ ފަދަ ކަމެއް ފެނުނީމާ ނުއެއް ރޮޔެވެ.
އިންސާާނާގެ ކިބައިން އެދެވިގެން ވަނީ ﷲ ތަޢާލާގެ ކުޅަދުންވަންތަ ކަމަށް އިޢުތިރާފު ވުމެވެ. އެކަމަަކު އިންސާނާ ހުންނަނީ އެ ކަމަށް ރުހިގެންނެއް ނޫނެވެ. މިއަދު އެންމެ ލަފުޒެއް ދީފައި އިންސާނާއަށް ސަލާމަތް ވެގެން ދެވިދާނެއެވެ. އެކަމަކު އަންނާން އޮތް ދުވަހަކީ އެކަހަލަ ދުވަހެއް ނޫނެވެ. އެ ދުވަހަކުން މުޅި ކާއިނާތު ދީފައިވެސް ސަލާމަތް ވެގެންނެއް ނުދެވޭނެއެވެ. މިއަދުގެ އިންސާނާއަށް ނިކަން ބައްލަވައި ލައްވާށެވެ. ޢޖާއިބެއް ނުވޭތޯއެވެ؟ މާދަމާ އައުމަކަށް މާ ގިނަ ވަގުތެއް ނެތެވެ. މާދަމާގެ އިންސާނާވެސް ވެގެން ދާނީ ޢަޖާއިބު ވާ ފަދަ އިންސާނަކަށެވެ.
