ސަރުކާރުން ރޯޑް ޑިވެލޮޕްމަންޓް ކޯޕަރޭޝަން (އާރު.ޑީ.ސީ) ރިފޯމް ކުރުމަށް ކުރި މަސައްކަތުގެ ސަބަބުން ކުންފުނީގެ ޚަރަދުތައް މަހަކު 20 މިލިއަނަށް ކުޑަކުރެވިފައިވާކަމަށް އާރު.ޑީ.ސީ ގެ މެނޭޖިންގ ޑިރެކްޓަރ އަލީ ޒުހައިރު ވިދާޅުވެއްޖެއެވެ.
އެމްޑީ ޒުހެއިރު މިހެން ވިދާޅުވީ ޕީ.އެސް.އެމް ނިއުސްއަށް ދެއްވި އިންޓަވިއުއެއްގައެވެ.
ކުރީގެ ސަރުކާރުގެ ދައުރުގައި އާރު.ޑީ.ސީގެ ޚަރަދުތައް ވަނީ ވަރަށް ބޮޑަށް އިތުރުވެފައެވެ. އާމްދަނީއަށްވުރެ ޚަރަދު ބޮޑުވެފައިވާތީ، ޒުހައިރު ވެރިކަމާ ހަވާލުވުމާއެކު އެންމެ އިސްކަމެއް ދެއްވީ ކުންފުނީގެ މާލީ ގޮންޖެހުންތަކަށް ހައްލު ހޯދުމަށެވެ. ޒުހެއިރު ވިދާޅުވިގޮތުގައި، ކުންފުނީގެ މާލީ ހާލަތު ރަނގަޅުކުރުމަށް އެޅިދާނެ ފިޔަވަޅުތައް ދެނެގަތުމަކީ އޭނާގެ ފުރަތަމަ މަސައްކަތްތަކުގެ ތެރޭގައި ހިމެނޭ ކަމެކެވެ. މި އިސްލާހީ މަސައްކަތުގައި އާރު.ޑީ.ސީގެ ބޯޑާއި ޕަބްލިކް ކޯޕަރޭޝަން ބޯޑާ (ޕީ.ސީ.ބީ) ގާތުން މަޝްވަރާކުރެވުނު ކަމަށްވެސް އެމްޑީ ވިދާޅުވިއެވެ.
އިސްލާހީ މަސައްކަތުގެ މައިގަނޑު އަމާޒަކަށްވީ ހިންގުމުގެ ޚަރަދުތައް ކުޑަކުރުމެވެ. މި ގޮތުން އެޅުނު މުހިންމު ފިޔަވަޅުތަކުގެ ތެރޭގައި މުދާ ގަތުމުގައި ކަނޑައެޅިފައިވާ އަގުތަކެއް ބޭނުންކުރަން ފެށުން ހިމެނެއެވެ. މި ފިޔަވަޅުތަކުގެ ސަބަބުން ކުންފުނީގެ މަހު ޚަރަދު 18 އާއި 20 މިލިއަނާ ދެމެދުގެ އަދަދަކުން ކުޑަކުރެވުނު ކަމަށް ޒުހައިރު ވިދާޅުވިއެވެ.
ޚަރަދު ކުޑަކުރުމުގެ އިތުރުން، އިތުރުގަޑީގެ މަސައްކަތް ބެލެހެއްޓުމަށް ކޮންޓްރޯލް މެކޭނިޒަމެއް ތަޢާރަފުކުރެވުނެވެ. މީގެ އިތުރުން، އާރު.ޑީ.ސީ ވަނީ ރަސްމީކޮށް ހަފްތާއަކު 6 ދުވަހު މަސައްކަތްކުރާ ގޮތަށް ބަދަލުވެފައެވެ. މިއީ ހަރުދަނާކަން އިތުރުކޮށް ޚަރަދު ކުޑަކުރުމަށް އެޅުނު ފިޔަވަޅެކެވެ.
ޒުހައިރު އިތުރަށް ފާހަގަކުރެއްވި ގޮތުގައި، ކުރީގެ ސަރުކާރުގެ ދުވަސްވަރު ހުއްޓާލާފައިވާ 17 މަޝްރޫޢު މިހާރު ވަނީ އަލުން ފަށާފައެވެ. އަދި 10 އައު މަޝްރޫޢު މިހާރު ދަނީ ކުރިއަށެވެ. މިއީ ކުންފުނީގެ ތަރައްޤީގެ މަސައްކަތްތަކުގައި ފާހަގަކޮށްލެވޭ ކުރިއެރުމެކެވެ.
