ރާއްޖޭގެ މޫސުން ގޯސްވުމާ ގުޅިގެން މޯލްޑީވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ފެރީ ޚިދުމަތްތަކަށް ބުރޫއަރާފާނެކަމަށް އެ ކުންފުނިން މިއަދު އިންޒާރު ދީފިއެވެ.
މޯލްޑިވްސް މީޓިއޮރޮލޮޖިކަލް ސަރވިސްއިން ދީފައިވާ މަޢުލޫމާތަށް ބިނާކޮށް އެމްޓީސީސީން ނެރުނު ބަޔާނެއްގައި ބުނެފައިވަނީ، ރާއްޖެއާއި ބޭ އޮފް ބެންގާލްއާ ދެމެދު އުފެދިފައިވާ ބާރުގަދަ ކޮޅިގަނޑެއްގެ ސަބަބުން ބުރާސްފަތި ދުވަހުން ފެށިގެން ކުރިއަށް އޮތް 5 ދުވަހު ރާއްޖޭގެ ސަރަހައްދުގެ ވައި ބާރުވާނެ ކަމަށެވެ.
މީޓް އޮފީހުގެ މަޢުލޫމާތު ދައްކާ ގޮތުގައި ބޭ އޮފް ބެންގާލްގައި އުފެދިފައިވާ ކޮޅިގަނޑު ކުރިއަށް އޮތް 24 ގަޑިއިރުގެ ތެރޭގައި ބާރުގަދަވެ، ހުޅަނގު އުތުރަށް ޖެހި، ތަމިލްނާޑޫއާއި ސްރީލަންކާއަށް ދާނެއެވެ. މީގެ އިތުރުން، ރާއްޖޭގެ އިރުދެކުނު ސަރަހައްދުގައިވެސް ކޮޅިގަނޑެއް އުފެދިފައިވާކަމަށް އޮފީހުން ބުނެއެވެ.
މި ދެ ކޮޅިގަނޑުގެ ސަބަބުން ބުދަ ދުވަހުން ފެށިގެން ކުރިއަށް އޮތް 5 ދުވަހު ރާއްޖޭގެ އެކި ސަރަހައްދުތަކުގައި ވައި ބާރުވާނެ ކަމަށް ލަފާކުރެވޭކަމަށް މެޓް އޮފީހުން ނެރުނު ވަޔާނުގައި ވިދާޅުވެފައިވެއެވެ. އަދި ދެކުނު އަތޮޅުތަކުގައި ވައި ގާތްގަނޑަކަށް ގަޑިއަކު 15 އިން 25 މޭލުގެ ބާރުމިނުގައި ޖެހޭނެ ކަމަށާއި، މެދު އަދި އުތުރު އަތޮޅުތަކުގައި ގަޑިއަކު 13 އިން 23 މޭލުގެ ބާރުމިނުގައި ވައި ޖެހޭނެ ކަމަށް އެ އިދާރާއިން ލަފާކުރެވެއެވެ. މި މުއްދަތުގައި ރާއްޖޭގެ ހުރިހާ ސަރަހައްދެއްގައިވެސް ކަނޑު ގަދަވާނެއެވެ.
މޫސުން ގޯސްވުމާ ގުޅިގެން، އެމްޓީސީސީން ފޯރުކޮށްދޭ ޒޯން ފެރީތަކާއި އާރްޓީއެލް ފެރީގެ ޝެޑިއުލްތަކަށް ބުރޫއެރުމަކީ އެކަށީގެންވާ ކަމެއްކަމަށް އެ ކުންފުނިން ވަނީ އިންޒާރު ދީފައެވެ. އަދި އިތުރު މަޢުލޫމާތު ހޯދުމަށް އެމްޓީސީސީގެ ހޮޓްލައިން 1650 އަށް ގުޅުމަށް ވަނީ އެދިފައެވެ.
މެޓް އޮފީހުން ވަނީ ކަނޑުދަތުރުކުރާ ފަރާތްތަކަށް މި މުއްދަތުގައި ފަރުވާތެރިވުމަށް އިންޒާރު ދީފައެވެ. އަދި ބާރު ވައިގެ ސަބަބުން ލިބިދާނެ ގެއްލުންތަކުން ރައްކާތެރިވުމަށް އާންމު ރައްޔިތުންނަށްވެސް އިރުޝާދު ދީފައިވެއެވެ.
