ގެލަޕްގެ 2024 ވަނަ އަހަރުގެ ގްލޯބަލް އިމޯޝަންސް ރިޕޯޓުގައިވާ ގޮތުން ތުރުކީވިލާތަކީ ދުނިޔޭގައި މީހުން ދެވަނައަށް އެންމެ ރުޅިގަދަ ގައުމެވެ. ދުނިޔޭގެ އާބާދީތަކުގެ ޖަޒުބާތީ ހާލަތު ވަޒަންކުރާ އަހަރީ ސާވޭގައި ތުރުކީވިލާތުގެ އާބާދީގެ 48 އިންސައްތަ މީހުން ރުޅިގަދަ ކަމަށް ރިޕޯޓްކޮށްފައިވެއެވެ. އަދި ޔޫރަޕްގައި އެންމެ ރުޅިގަދަ ގައުމަކަށް ގިންތިކޮށްފައިވަނީ ތުރުކީއެވެ.
ދުނިޔޭގައި އެންމެ ރުޅިގަދަ މީހުން އުޅެނީ، ލުބުނާންގައި ކަމަށް ދައްކައެވެ. ލުބުނާންގެ 49 ޕަސެންޓް ރައްޔިތުން ގުޅިގަދަ ކަމަށް ސާވޭއިން ދައްކައެވެ.
ދުނިޔޭގައި ތިން ވަނައަށް އެންމެ ރުޅިގަދަ މީހުން އުޅެނީ އަރްމީނިއާ ގައެވެ. އެއަށްފަހު އިރާގު، އަފްޣާނިސްތާން، ޖޯޑަން މާލީ އަދި ސިއެރާ ލިއޯން ތަރުތީބުން ގިންތިކޮށްފައި ވެއެވެ.
ރުޅިވެރިކަމަކީ ޒަމާނުއްސުރެ ތުރުކީގައި އާންމުވެފައިވާ ޖަޒުބާތެއް ކަމަށް އެގައުމުގެ މީޑިއާއިން ބުނެއެވެ.
ތުރުކީގައި ރިޕޯޓްކުރާ ރުޅިވެރިކަމުގެ ބޮޑު ބައެއް ނިސްބަތްވަނީ ދުވަހުން ދުވަހަށް ދިމާވާ ގޮންޖެހުންތަކަށް ކަމަށް ގެލަޕް ސާވޭއިން ބުނެއެވެ.
ތަޖުރިބާކާރުން ބުނާ ގޮތުގައި އާބާދީގެ ބޮޑު ބައެއް ދިރިއުޅޭ އިސްތަންބޫލުގައި ގިނަ ފަހަރަށް ރުޅިއާއި މާޔޫސްކަން އުފެދެނީ ޒަމާނީ ދިރިއުޅުމުގެ ފިއްތުންތަކުގެ ސަބަބުންނެވެ.
މީގެއިތުރުން، ދުނިޔޭގެ އެންމެ އުފާވެރި ގައުމުކަމަށް އެ ސާވޭގައި ފާހަގަ ކޮށްފައި ވަނީ އެލް ސަލްވަޑޯރެވެ. ސަލްވާޑޯރްގައި ރައްޔިތުން އިސްކަންދެނީ އިޖުތިމާއީ ގުޅުންތަކާއި އާއިލީ އެއްވުންތަކާއި އުފާފާޅުކުރުންތަކަށް ކަމަށް ބުނެފައި ވެއެވެ.
