ދެކުނު ކޮރެއާގެ ވެރިރަށް ސޯލްގެ ބައެއް ހިސާބުތަކުގައި މިއަދު 20 ސެންޓިމީޓަރަށް ވުރެ އިތުރަށް ސްނޯ ވެހިފައި ވެއެވެ. އަދި ޓްރެފިކަށް ބުރޫއަރާ، ދަތުރުވެރިންނަށް ބޮޑެތި ދަތިތަކެއް ކުރިމަތިވެފައިވާ ކަމަށް މީޑިއާއިން ރިޕޯޓު ކޮށްފައި ވެއެވެ.
މޫސުމާ ބެހޭ އިދާރާއިން ވަނީ ހުރިހާ ސަރަހައްދަކަށް ވެސް ބޯކޮށް ސްނޯ ވެހުނު ކަމަށް ބުނެފައެވެ.
މިއީ 1907 ވަނަ އަހަރުގެ އޮކްޓޯބަރު މަހުން ފެށިގެން މިޒަމާނުގެ އާލާތްތައް ބޭނުންކޮށްގެން މޫސުން ބަލަން ފެށި ފަހުން އެންމެ ގިނައިން ސުނޯ ވެހުނު ފަހަރެވެ.
މިއަދު އެތައް ސަރަޙައްދެއްގައި އެކްސިޑެންޓްތައް ހިނގައި މަގުތައް ބަންދުވެ ޓްރެފިކަށް ހުރަސްއެޅިފައި ވެއެވެ.
ކޮރެއާ އެއާޕޯޓްސް ކޯޕަރޭޝަނާއި އިންޗިއޮން އިންޓަނޭޝަނަލް އެއާޕޯޓް ކޯޕަރޭޝަނުން ބުނާ ގޮތުގައި އެތެރޭގެ އަދި ބައިނަލްއަގްވާމީ 40 އަށް ވުރެ ގިނަ ފްލައިޓް ކެންސަލްކުރަން ޖެހުނެވެ. އަދި ގާތްގަނޑަކަށް 200 ފްލައިޓްގެ ދަތުރު ލަސްވި އެވެ.
