ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށްޓަކައި އުފެއްދުމަށް ރޭވިފައިވާ ދަނޑުވެރިކަމުގެ އިޤްތިޞާދީ ސަރަޙައްދު، ފުރަތަމަ އުތުރު ތިލަފަޅުގައި ގާއިމުކުރުމަށް ރޭވިފައިވީނަމަވެސް، މިހާރު އެ ސަރަޙައްދު ފުށިދިއްގަރުފަޅަށް ބަދަލުކުރެވިފައިވާކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އިއުލާނުކޮށްފައެވެ.
މިއަހަރުގެ ކުރީކޮޅު، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން ކުންފުނިން ވަނީ ޗައިނާގެ ހާބަރ އިންޖިނިއަރިންގ ކޮމްޕެނީ ލިމިޓެޑާއެކު ރާއްޖޭގެ ކާބޯތަކެތީގެ ސަޕްލައި ރައްކާތެރިކުރުމަށް އަމާޒުކޮށްގެން ދަނޑުވެރިކަމުގެ އިޤްތިޞާދީ ސަރަޙައްދެއް ގާއިމުކުރުމަށް އެއްބަސްވުމެއްގައި ސޮއިކޮށްފައެވެ. މި މަޝްރޫޢުގެ ދަށުން 100 ހެކްޓަރުގެ ބިން ހިއްކައި މި ސަރަޙައްދު އުފެއްދުމަށް ހަމަޖެހިފައިވާއިރު، 2026 ވަނަ އަހަރުގެ ކުރީކޮޅު މި މަޝްރޫޢު ފެށުމަށް ވަނީ ރޭވިފައިވާކަމަށް އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމް ވިދާޅުވެފައިވެއެވެ.
މި މަޝްރޫއުައަށް ބިން ހިއްކުމަށް ނިންމާފައިވަނީ މަޝްރޫޢު ތަންފީޒުކުރުމަށް ބޮޑު ސަރަޙައްދެއް ބޭނުންވާތީކަމަށް އެސްޓީއޯއިން ވިދާޅުވެފައިވެއެވެ،
މި ދަނޑުވެރިކަމުގެ އިޤްތިޞާދީ ސަރަޙައްދުގައި ތަރުކާރީއާއި މޭވާ އުފެއްދުމަށް ގްރީންހައުސްތަކާއި، ތަމްރީނު މަރުކަޒަކާއި އަދި މުވައްޒަފުން ދިރިއުޅުމަށް ބްލޮކްތައް ހިމެނޭނެއެވެ. މި މަޝްރޫޢުގެ ދެވަނަ ފިޔަވަހީގައި ރާއްޖެއަށް ބޭނުންވާ ކުކުޅު ބިސް އުފެއްދުމަށް ޚާއްޞަ ކުކުޅު ފާމެއް ހިމެނޭނެއެވެ.
