ބަންކަރިންގެ ޚިދުމަތް ކުރިމަގުގައި ވަރަށް މުހިންމު ސިނާއަތަކަށް ވެގެންދާނެ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޝިމާދު ވިދާޅުވީ، ކޮންމެ އިންވެސްޓްމަންޓެއްގައިވެސް ލައިފްސައިކަލެއް އޮންނާނެކަމަށާއި، މިހާރު މިހާރު ރާއްޖެ އޮތީ ފުރަތަމަ މަރުހަލާގައިކަމަށެވެ. އަދި ރާއްޖެ އޮތް ތަނުގެ ގޮތުން މިކަން ތަރައްގީވެ ކުރިއަރާ ދާއިރު މިއީ ވަރަށް މުހިންމު ސިނާއަތަކަށް ވެގެންދާނެކަމަށް ގަބޫލުކުރައްވާ ކަމަށް ޝިމާދު ވިދާޅުވިއެވެ.
ރާއްޖޭގައި ބައިނަލްއަޤްވާމީ ބަންކަރިންގެ ޚިދުމަތް ފެށިފައިވަނީ މިއަހަރުގެ ސެޕްޓެމްބަރު މަހު އިހަވަންދިއްޕޮޅުގައެވެ. މި މަޝްރޫއަށް ސަރުކާރުން 15 މިލިއަން އެމެރިކާ ޑޮލަރާއި 20 މިލިއަން އެމެރިކާ ޑޮލަރާ ދެމެދުގެ އަދަދެއް އިންވެސްޓްކޮށްފައިވެއެވެ. މި ޚިދުމަތް ފޯރުކޮށްދެނީ އެސްޓީއޯއިން، ދުނިޔޭގެ ނަން މަޝްހޫރު ކުންފުންޏެއް ކަމަށްވާ ވިޓޯލް ބަންކަރސްއާ ގުޅިގެންނެވެ.
މި ޚިދުމަތް ފޯރުކޮށްދިނުމަށްޓަކައި އެސްޓީއޯއިން ވަނީ 4,000 ޓަނުގެ ޖާގައިގެ ދެ ތެޔޮ ޓޭންކަރު ރާއްޖެ ގެނެސްފައެވެ. މިހާރު ރާއްޖޭގައި ފޯރުކޮށްދެނީ އޮފްޝޯ ބަންކަރިންގެ ޚިދުމަތް ނަމަވެސް، ކުރިމަގުގައި އޮންޝޯ ބަންކަރިންގެ ޚިދުމަތްވެސް ތައާރަފުކުރުމަށް ސަރުކާރުން ރާވައެވެ.
ސަރުކާރުގެ އަންދާޒާގައި، ބަންކަރިންގެ ޚިދުމަތުން އިތުރު 400 މިލިއަން އެމެރިކާ ޑޮލަރު ލިބޭނެ ކަމަށާއި، މިއާއެކު 6 ބިލިއަން ރުފިޔާގެ އައު ސިނާއަތެއް އުފެދިގެންދާނެ ކަމަށް ލަފާކުރެވެއެވެ.
