އީރާނުގެ އެންމެ ވާދަވެރި ދެ ކުލަބުން ކުޅުނު މެޗް ބެލުމަށް ހަމައެކަނި އަންހެނުން ވެއްދި ކަމަށްޓަކައި ފީފާގެ ރައީސް ޖިއާނީ އިންފެންޓީނޯ އީރާނަށް ޝުކުރު އަދާކުރައްވައިފިއެވެ.
އީރާންގެ އިސްފަހާންގެ ނަޤްޝޭ ޖަހާން ސްޓޭޑިއަމްގައި މެޗް ކުޅުނީ، ސެޕަހާންއާއި ޕާރްސީޕޯލިސް ޓީމުންނެވެ.
މީގެ ކުރިން ތެހެރާންގެ އާޒާދީ ސްޓޭޑިއަމްގައި މި ދެޓީމުން މެޗް ކުޅުނުއިރު ސެޕަހާންއަށް ސަޕޯޓު ކުރާ އިސްފަރާތަކުން ވަނީ ޕާރްސީޕޯލިސް ޓީމަށް ސަޕޯޓުކުރާ ކުޅިބަލަން ތިބި އަންހެނުންނަށް އިހާނެތި ބަސްތަކެއް ރައްދުކޮށްފައެވެ. އެކަމާ ގުޅިގެން އީރާން ފުޓްބޯލް ފެޑެރޭޝަނުން ވަނީ ދެ ޓީމްވެސް ޖުރިމާނާކޮށް އަދަބު ދީފައެވެ. އަދި ބުނެފައި ވަނީ ދެން ދެ ޓީމުން ބައްދަލު ކުރާ މެޗް ކުޅެން ޖެހޭނީ ހަމައެކަނި އަންހެން ބެލުންތެރިންނާއެކުގައި ކަމަށެވެ.
ހަމައެކަނި 45ހާސް އަންހެން ބެލުންތެރިންނާއެކު ދެ ޓީމުގެ މެޗް ކުރިއަށް ގެންދިޔައީތީ އިންފެންޓީނޯ ވަނީ ތެހެރާނަށް ޝުކުރުއަދާކޮށް އިންތިޒާމުގެ ހަރުދަނާ ކަމަށް ތައުރީފް ކުރައްވާފައެވެ.
