ޕޮލެންޑްގައި މޫނު ނިވާކޮށްގެން ތިބި ދެ ވަގަކު ވަދެ ރޭގަނޑު ގަޑީގައި ޝްޗެސިން ސިޓީގެ ފައިސާ މާރުކުރާ އޮފީހެއް ފަޅާލަން އުޅެފިއެވެ. މިމީހުންގެ މަސައްކަތް ނާކާމިޔާބުވީ އޮފީހުގެ ބްލެޓް ޕުރޫފް ބިއްލޫރިގަނޑު ތަޅާ ނުލެވުމުންނެވެ.
އެކްސްޗޭންޖް އޮފީހުގެ ފަރާތުން ވާހަކަ ދެއްކި މީހަކު ޕޮލެންޑްގެ ޓީވީއެން24 ގައި ބުނެފައި ވަނީ، ވަގުން، ގާތްގަނޑަކަށް 50 ފަހަރަށް ބިއްލޫރުގަނޑުގައި މަރުތޭލުން ޖެހިކަމަށެވެ. އދި މައްސައްކަތް ނާކާމިބު ނުވުމުންނާއި އެލާމް އަޅަން ފެށުމުން ފިލައިގެން ދިޔައީ ކަމަށް އޭނާ ބުންޏެވެ.
އެކްސްޗޭންޖް އޮފީހުން މީސްމީޑިއާގައި ޝާއިއުކުރި ސަވައިލެންސް ވީޑިއޯއިން ފެންނަ ގޮތުގައި އެމީހުންގެ މަސައްކަތް ނާކާމިޔާބުވީ ބިއްލޫރިގަނޑުގެ މޮޅުކަމުންނެވެ.
މިހާރު އެ ބިއްލޫރިގަނޑު އުފެއްދި ކުންފުނިން ވަނީ އެމީހުންގެ އުފެއްދުމުގެ ޕްރޮމޯޝަނަށް އެ ވީޑިއޯ ބޭނުން ކުރުމަށް ނިންމާފައެވެ.
ފުލުހުން ވަނީ އިރުކޮޅެއްގެ ތެރޭގައި ދެ ވަގުން ހައްޔަރުކޮށްފައެވެ. އެމީހުން ގަތް މަރުތޭލަކީ ކައިރި ފިހާރައަކުން، ކޭޝް ކާޑުން ފައިސާ ދައްކައިގެން ގަތް މަރުތޭލެވެ.
