ސޯޝިއަލް މީޑިޔާގެ ޕްލެޓްފޯމްތަކުގައި ކާކުކަން ނޭނގޭ އެކައުންޓްތަކުން ޕޯސްޓްކޮށްފައި ހުންނަ އެއްޗެތި ޝެއަރ ކުރުމުގެ ކުރިން ތެދު ދޮގު ބެލުމަށާއި އެފަދަ ޕޯސްޓްތަކުގައި ހުންނަ ވާހަކަތައް، ޞައްޙަ ފަރާތަކުން އެނގުމުންނޫނީ، ޤަބޫލުކޮށް ނުފެތުރުމަށް އިބްރާހިމް އިސްމާއިލް (އިބްރާ) ގޮވާލައްވައިފިއެވެ.
އެމްޑީޕީގެ ރައީސް ކަމާއި ރައްޔިތުން މަޖިލީހުގެ މެމްބަރުކަން އަދި ތައުލީމީ ދާއިރާގައި ވަރަށް ގިނަ ދުވަހު ޚިދުމަތް ކުރައްވާފައިވާ އިބްރާ މިހެން ވިދާޅުވީ ފޭސްބުކުގައި މިރޭ ކުރެއްވި ޕޯސްޓެއްގައެވެ.
އިބްރާ ކުރެއްވި ޕޯސްޓުގައި ވިދާޅުވީ މިކަމަކީ މިހާރު މުޅި މިދައުލަތް ޚަރާބުވެ، ކުށެއްނެތް، މަޢުޞޫމް އެތައް ބައެއްގެ އަބުރު ވެއްޔާ މޮޑެވޭ ކަމަކަށް ވެއްޖެއެވެ. މިކަން ފަހިވެގެންދަނީ، ސޯޝަލް މީޑިއާގައި ކޮންމެ މީހަކު ކޮންމެ އެއްޗެއް ލިޔުނަސް އެވާހަކަތައް ޤަބޫލުކޮށް، އެވާހަކަ ފަތުރާ މީހުން ގިނަވީމައެވެ.
"ހަނދާންކުރަންވީ ކަމަކީ މިއީއެވެ. ތެދު، ހެކި ހުރި ވާހަކަ ހާމަކުރުމަށް ބިރުގަންނަންޖެހޭ ސަބަބެއް ނޯންނާނެއެވެ. އެހެންކަމުން، މިކަހަލަ ވާހަކަ ހާމަކުރަން، ކާކުކަން ނޭނގޭ "އެނޯނިމަސް" އެކައުންޓްތައް ބޭނުންކުރަނީ ކީއްވެ ހެއްޔެވެ؟ އެއީ ފިތުނަ އުފައްދާށެވެ. މި ފިތުނަތަކުން މި މުޖުތަމަޢު ސަލާމަތްކުރުމަށް، ކާކުކަން ނޭނގޭ އެކައުންޓްތަކުން ޕޯސްޓްކޮށްފައި ހުންނަ އެއްޗެތި ޝެއަރ ނުކުރާށެވެ!" އިބްރާ ކުރެއްވި ޕޯސްޓުގައި އިތުރަށް ވިދާޅުވެފައިވެއެވެ.
އިބްރާ އެދިވަޑައިގަތީ ޕޯސްޓްތަކުގައި ހުންނަ ވާހަކަތައް، ޞައްޙަ ފަރާތަކުން އެނގުމުންނޫނީ، ޤަބޫލުކޮށް، އެހެންމީހުންގެ ގާތުގައި ނުދައްކުމަށެވެ!
"ވިސްނާލާށެވެ! ތިމާއާ ބެހޭގޮތުން އެފަދަ ދޮގުވާހަކަ ފެތުރެން އެކަކުވެސް އެދެމުހެއްޔެވެ؟" ޕޯސްޓުގެ އެންމެފަހު ޖުމްލައިގައި އިބްރާ ވިދާޅުވިއެވެ.
