ޖޯޖިޔާގައި އިންތިޚާބީ ރައީސަށް ތާއީދުކުރާ ބަޔަކާއި މަގާމުން ވަކިވެ ވަޑައިގަންނަވާ ރައީސަށް ތާއީދު ކުރާ ބަޔަކާ ދެމެދު މުޒާހަރާތައް ކުރެއެވެ. މަގާމުން ވަކިވެ ވަޑައިގަންނަވާ ރައީސަށް ތާއީދު ކުރާ ފަރާތްތަކުން އިންސާނުންގެ ސިލްސިލާއެއްގެ ގޮތުގައި އެތުރިގެން، މުޒާހަރާ ކުރަމުންދަނީ އެމެރިކާގެ ގައުމީ ސަލާން ޖަހައި، އިއްވަމުންނެވެ.
ވެރިކަން ކުރާ ޖޯޖިޔާގެ ބޮޑުވަޒީރު އިރާކްލީ ކޮބަކިޑްޒޭ ވަޒީރަކީ ޑްރީމް ޕާޓީގެ މެމްބަރެކެވެ. ރައީސްގެ މަގާމަށް އިންތިޚާބު ވެފައި ވަނީވެސް ޑްރީމް ޕާޓީގެ މެމްބަރެކެވެ. އެފަރާތަކީ، ކުރީގެ ފުޓްބޯޅަ ކުޅުންތެރިޔާ މިޚައިލް ކަވެލަޝްވިލީ އެވެ.
ޖޯޖިޔާގެ މަގާމުން ވަކިވެ ވަޑައިގަންނަވާ ރައީސަކީ އިދިކޮޅު ޕާޓީގެ މެމްބަރެކެވެ. އެ ރައީސް ވިދާޅުވަނީ ޖޯޖިޔާގެ ރިއާސީ އިންތިޚާބަކީ ނަޒާހަތްތެރި އިންތިޚާބެއް ނޫން ކަމަށެވެ. އަދި އިންތިޚާބު އަލުން ބާއްވަން ޖެހޭނެ ކަމަށެވެ.
ޖޯޖިޔާގެ ސިޔާސީ މައިދާނުގައި އުފެދިގެން އުޅޭ ހަމަނުޖެހުމަކީ، ރަޝިޔާއަށް ތާއީދުކުރާ މީހުންނާއި އެމެރިކާ އީޔޫއަށް ތާއީދު ކުރާ މީހުންގެ މެދުގައި އުފެދިގެން އުޅޭ ހަމަނުޖެހުމެކެވެ.
އައު ރައީސާއި ބޮޑު ވަޒީރަކީ، ރަޝިޔާއަށް ތާއީދު ކުރާ ކޮންޒަރވެޓިވް ޚިޔާލުގެ މީހުންނެވެ.
ވަކިވެވަޑައިގަންނަވާ ރައީސް ސަލޯމޭ ޒުރަބިޝްވިލީއާއި ސަޕޯޓަރުންނަކީ، ޔޫރަޕްގެ ޖަމާއަތުގައި ޖޯޖިޔާ ބައިވެރިކުރުމަށް ތާއީދުކުރާ ބައެކެވެ.
ރަޝިޔާއަށް ތާއީދު ކުރާ މީހުންނަކީ ޑްރީމް ޕާޓީގެ މީހުންނެވެ. މި ޕާޓީގެ މުގުލުގައި ހުންނަވަނީ ކުރީގެ ބޮޑު ވަޒީރެކެވެ. އޭނާއަކީ ޖޯޖިޔާގެ ސަރުކާރުގައި އެއްވެސް ރަސްމީ ހައިސިއްޔަތެއް އޮތް ފަރާތެއް ނޫނެވެ. ނަމަވެސް އެއީ ޖޯޖިޔާގެ އެންމެ ނުފޫޒުގަދަ ފަރާތެވެ. ކުރީގެ ބޮޑު ވަޒީރު އަދި މުއްސަނދި ވިޔަފާރިވެރިޔާ ބިޑްޒިނާ އިވަނިޝްވިލީ އަކީ ޑްރީމް ޕާޓީގެ ޝަރަފްވެރި ރައީސެވެ.
އެމެރިކާއިން ވަނީ އިންތިޚާބާ ގުޅިގެން ޖޯޖިޔާގެ ބައެއް މަސްއޫލުވެރިންނާއި އިވަނިޝްވިލީއާ ދެކޮޅަށް ދަތިކުރުމުގެ ފިޔަވަޅު އަޅައިފައެވެ.
