ޓޫރިސްޓް ވިސާ އާ ހިލާފުވެގެން ދެ ބިދޭސީއަކު އިމިގްރޭޝަނުގެ ބެލުމުގެ ދަށަށް ވަނީ ގެންގޮސްފިއެވެ.
އިމިގްރޭޝަނުން އެކްސްގައި އިއްޔެ ކުރި ޕޯސްޓެއްގައި ބުނީ ޓޫރިސްޓް ވިސާއާ ހިލާފުވެ ރާއްޖޭގައި މަސައްކަތް ކުރަމުންދާ ސީރިއާއާއި އުރުދުންގެ ދެ މީހުންގެ މައްސަލަ އެ އިދާރާގެ ސަމާލުކަމަށް އައިސްފައިވާ ކަމަށެވެ. އެއީ ރަބީ ހައިތަމް އަހްމަދު ޖުމަހު(24އ) އަދި އީމާން ކަރަމާން (19އ) އެވެ.
މި ދެ ބިދޭސީންނަކީ ޓޫރިސްޓް ވިސާގައި ތިބެ ހުއްދަނެތި ވިޔަފާރީގެ ހަރަކާތްތަކެއް ހިންގުމާއި އެކު އާންމު ތަންތަނުގައި ގާނޫނާ ހިލާފަށް ދިރިއުޅެމުން ގޮސްފައިވާ ފަރާތްތަކެއް ކަމަށާއި މިހާރު މަސައްކަތް ކުރަމުންދަނީ މި ދެ ބިދޭސީން ރާއްޖެއިން ޑިޕޯޓްކުރުމުގެ މަސައްކަތް ނިންމުމަށް ކަމަށްވެސް އިމިގްރޭޝަނުން ބުންޏެވެ.
އިމިގްރޭޝަނުން ކުރިން ވެސް ވަނީ ވިސާ ގަވައިދާ ހިލާފުވާ ފަރާތްތަކާމެދު ހަރުކަށި ފިޔަވަޅު އަޅާނެކަމަށް އިއުލާންކޮށްފައެވެ. އެގޮތުން މިހާތަނަށް އިމިގްރޭޝަންގެ އޮޕަރޭޝަންތަކުގައި ގިނަ އަދަދެއްގެ ބިދޭސީން ހިފަހައްޓައި، 5،000 އަށްވުރެ ގިނަ މީހުން ވަނީ ރާއްޖެއިން ޑީޕޯޓްކޮށްފައެވެ.
އިމިގްރޭޝަނުން ވަނީ ގަވައިދާ ހިލާފަށް އުޅޭ ބިދޭސީއަކުގެ މައުލޫމާތު ލިބޭނަމަ، އިމިގްރޭޝަންގެ ޕޯޓަލް މެދުވެރިކޮށް އެކަން ހިއްސާ ކުރުމަށް އެދިފައެވެ.
