މިއީ ރާއްޖޭގެ ފަރުފަރުގެ ބޭރުގައި ވަރަށް ގިނައިން އުޅޭމަހެކެވެ.
މިއީ ގިނަބިބީގައި ހުންނަ ދުރަށްދައްކާ ގަދަކުލަތަކެއް ހިމެނިފައިނުވާ މަހެއްކަމުގައިވިޔަސް ވަރަށް ފަރިކޮށް ކުދިކުދި އައިން ހަދައިގެންނާއި ޖޯޑުޖޯޑަށް ދުވެއުޅޭމަހެކެވެ. މިމަހަށް ވަކި ޚާއްސަ ނަމެއް ދިވެހިންގެތެރޭގައި ދެވިފައިނެތުމާއިއެކު މިމަހަށް "ކަލަރުބިބީ" ކިޔާނަންދީފައިވަނީ މަހުގެ ސައިންޓިފިކްނަމާއި، އިގިރޭސިނަމަށް ބަލާ މަހުގައި އެސިފައެއް ވަރަށް ފާޅުކޮށް ފެންނަންހުރި ސިފައެއްކަމަށްވާ ބޮލުގެ ނިމޭހިސާބުން ކަރުތާފަތްގަޑުމަތީން މަހުގެ ހުރަހަށް ހުދު ރޮނގެއް ހުންނާތީއެވެ. ދިވެހި އަންހެނުންގެ ބޯވަޅުގެއެތެރޭން ކަރުވަޅުތެރެ ނިވާކުރަން އަޅާ ފޮތިގަޑަށް ކިޔާ ދިވެހިނަމަކީ ކަލަރުކަމަށް ވުމާއެކު މިބަސް ބޭނުންކޮށްގެން މިމަހަށް “ކަލަރުބިބީ" ކިޔާފައިވަނީއެވެ. މަހުގެ ކާނާއަކީ ގަލުގެމާގަޑެވެ.
މަހުގެ މަތީކޮތަރިބައިގައި 12 ހަރުކަށްޓާއެކު 25 އާއި 28 އާދެމެދުގެ ޢަދަދަކަށް މަޑުކަށިހުރެއެވެ. ބަނޑުދަށްފަރާތު ކޮތަރިބައިގައި 3 ހަރުކަށްޓާއެކު 20 އާއި 22 އާދެމެދުގެ ޢަދަދަކަށް މަޑުކަށިހުރެއެވެ. މަހުގެ ކުލައަކީ މަޑުމުށިކުލައެވެ. ބޮލުގެ ފަހަތުބައިގައި ފުޅާކޮށް ހުދު ރޮނގެއް ހުރަހަށް ހުރެއެވެ. އަދި މަހުގެ ތުންކޮޅުގައި ހުދުކުލައިގެ ރޮނގުތަކެއް ހުރެއެވެ. ބޮލުގެ އެހެނިހެން ބައިތައް ހުންނަނީ ކަޅުކުލައަކަށްވާ ގަދަމުށިކުލައެއްގައެވެ. މަހުގެ ނިގޫފަތުގެ ކައިރިފަށްނޫން އެހެންބައިތައް ހުންނަނީ ފަނޑު ރަތްކުލައެއްގައެވެ. ކަލަރުބިބީ 16 ސެންޓިމީޓަރަށް ބޮޑުވެއެވެ.
މަސްދަރު: ފިޝަސް އޮފް ދަ މޯލްޑިވްސް، މޯލްޑިވްސް މެރިން ރިސާޗް ސެންޓަރ، 2003
