މިއީ ރާއްޖޭގެ ތިލަފަޅުތަކުގައި އުޅޭ ކުޑަ މަހެކެވެ.
މިމަސް އެންމެ ބޮޑުވަނީ 8 ސެންޓިމީޓަރަށެވެ. ގިނައިން ފެނިފައި ހުންނަނީ ކުޑަކޮށް ރާޅުބިންދާ ހިސާބުތަކުގައެވެ. މިއީ މީޓަރަށްވުރެ ތިލަ ހިސާބުތަކުގައި އެކަހެރިކޮންނާއި ބައިބަޔަށް އުޅޭމަހެކެވެ. މިއީ ދިވެހިން ކައިއުޅޭ މަހެއްނޫނެވެ. ނަމަވެސް މާސްހިފަން މޫދަށް އެރިއުޅޭ ކުޑަކުދިން މަޖަލަކަށް ގެންގުޅެން ހިފާއުޅޭ މަސްތަކުގެ ތެރޭގައި މިބާވަތުގެ ދަނބާ ހިމެނެއެވެ. މަހުގެ ޢާއްމު ކާނާއަކީ ގަލުފެއްސެވެ.
މަހުގެ ބުރަކަށިމަތީ ކޮތަރިބައިގައި 13 ހަރުކަށްޓާއެކު 13 ނުވަތަ 14 މަޑުކަށިހުރެއެވެ. ބަނޑުދަށްފަރާތު ކޮތަރިބައިގައި 2 ހަރުކަށްޓާއެކު 12 އާއި 14 އާ ދެމެދުގެ ޢަދަދަކަށް މަޑުކަށިހުރެއެވެ. މަހުގެ ކުލައަކީ ގަދަ މުށިކުލައެވެ. ކަންފަތްގަޑު ހުންނަނީ ރީނދޫކުލައިގައެވެ. މިބާވަތުގެ ޅަމަހުގެ ބުރަކަށިމަތީ ކޮތަރިބައިގެ ފަހަތުކޮޅުގައި ކަޅުކުލައިގެ ލަފެއް ފާޅުކޮށްހުރެއެވެ. މިބާވަތުގެ ކުދި ދަނބާ ހުންނަނީ ދޮން ރީނދޫކުލައިގައެވެ. އަދި ބުރަކަށިމަތި ހުންނަނީ ނޫކުލައިގައެވެ. މިމަހަށް ކިޔާ ވަކި ޚާއްސަ ނަމެއް ރެކޯޑްކުރެވިފައި ނެތުމާއެކު މަހުގައި ހުރި ފާހަގަކުރެވޭ ސިފައަށް ވިސްނާ "ދޮންކަރު ދަނބާ” ކިޔާފައިވަނީއެވެ.
މަސްދަރު: ފިޝަސް އޮފް ދަ މޯލްޑިވްސް، މޯލްޑިވްސް މެރިން ރިސާޗް ސެންޓަރ، 2003
