މިއަހަރު ތެރޭގައި ރާއްޖޭގެ ހުރިހާ ރަށެއްގައި އޭޓީއެމްގެ ހިދުމަތް ގާއިމު ކުރެވިގެން ދާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ ހުވަދޫ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ނަޑެއްލާ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
"މި ފެށިގެންދާ އަހަރުގައި ރާއްޖޭގެ ކޮންމެ ރަށެއްގައި އޭޓީއެމްގެ ހިދުމަތް ގާއިމުވެގެން ދާނެ.. ތަރުތީބުވެގެން ހަމަ ހުރިހާ ރަށެއްގައި ވެސް އޭޓީއެމް ގާއިމު ކުރުމުގެ މަސައްކަތް ހަވާލުކުރެވި މަސައްކަތް ފެށިގެންދާނެ. އެހެންވީމަ އެކަން އޭޓީއެމް ނެތް ހުރިހާ ރަށެއްގައި ވެސް ވާނެ" ރައީސް މުއިއްޒު ވިދާޅުވިއެވެ.
ރާއްޖޭގެ ހުރިހާ ރަށެއްގައި އޭޓީއެމްގެ ހިދުމަތް ގާއިމް ކުރެއްވުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. މީގެ އިތުރުން ލޯކަލް ޓުއަރިޒަމް ތަރައްޤީވެފައިވާ ރަށްރަށަށުގައި ޑޮލަރު އޭޓީއެމްގެ ޚިދުމަތް ފެއްޓެވުމަކީވެސް އެމަނިކުފާނުގެ ވައުދެކެވެ.
