ޑިފެންސް މިނިސްޓަރު މުހައްމަދު ޣައްސާން މައުމޫން މާދަމާއިން ފެށިގެން 3 ދުވަހުގެ ދަތުރުފުޅެއްގައި އިންޑިއާއަށް ވަޑައިގަންނަވާނެއެވެ. މިދަތުރުފުޅުގައި ރާއްޖޭގެ ދިފާޢީ ވަޒީރު، އިންޑިއާގެ ޑިފެންސް މިނިސްޓަރު ރާޖްނާތު ސިންގް އާއެކު މަޝްވަރާތައް ބާއްވަވާނެއެވެ. އަދި ދިއްލީގައި ސަރުކާރުގެ ކުރިއަށް ތިއްބެވި ބޭފުޅުންނާ ބައްދަލު ކުރައްވާނެ އެވެ.
ވަޒީރު ޣައްސާންގެ މި ދަތުރުފުޅަކީ، އިންޑިއާގެ ސިފައިން ރާއްޖެއިން ބޭރުކޮށްލިތާ 8 މސްފަހުން ކުރައްވާ ދަތުރުފުޅެކެވެ.
މި ދަތުރުފުޅުގައި، އެމްއެންޑީއެފްގެ ޤާބިލްކަން އިތުރުކުރުމުގެ މަޝްވަރާތަކުގެ އިތުރުން ޑިފެންސް އިކުއިޕްމަންޓް ފޯރުކޮށްދިނުމާއި ތަމްރީނާއި ދިފާއީ މަޝްރޫއުތައް ހިމެނޭ ގޮތަށް އެތައް ރޮނގަކުން، ދެ މިނިސްޓަރުން ދެ ޤައުމުގެ ގުޅުން މުރާޖައާ ކުރައްވާނެ ކަމަށް އިންޑިއާގެ މީޑިއާއިން ރިޕޯޓު ކުރެއެވެ.
"އިންޑިއަން އޯޝަން ރީޖަންގައި ހަމަޖެހުމާއި ތަނަވަސްކަން ގެނައުމަށް އަމާޒު ހިފާފައިވާ އިންޑިއާގެ "ނެއިބަރހުޑް ފަސްޓް" ސިޔާސަތުގައި ދިވެހިރާއްޖެއަކީ، ހާއްސަ ޖާގައެއް ދެވިފައިވާ ޤައުމެއް،" އިންޑިއާގެ ދިފާއީ ވުޒާރާއިން މިނިސްޓަރ ޣައްސާންގެ ދަތުރުފުޅާ ދިމާކޮށް ނެރުނު ބަޔާނުގައި ބުނެފައި ވެއެވެ.
"ދެ ގައުމަކީ ވެސް އިންޑިއަން އޯޝަން ރީޖަންގެ ސަލާމަތާއި ރައްކާތެރިކަން ދެމެހެއްޓުމުގައި މުހިންމު ފަރާތްތަކެއް. އެހެންވެ، އިންޑިއާގެ ސެކިއުރިޓީ އެންޑް ގްރޯތް ފޯ އޮލް އިން ދަ ރީޖަން (ސާގަރު) ގެ މާރެސްއަށް ވެސް ރާއްޖެއަކީ މުހިންމު ޤައުމެއް،" އެ މިނިސްޓްރީން އިތުރަށް ބުނެފައި ވެއެވެ.
ޣައްސާން މައުމޫންގެ ދަތުރުފުޅުގައި، ގޯއާ އަދި މުމްބާއީއަށް ވެސް ވަޑައިގަންނަވާނެ އެވެ.
