ދިވެހިރާއްޖޭގައި ދަނޑުވެރިންނަށް އޮތީ އުފާފާގަތިކަން ކަމުގައި ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ހުވަދުއަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، މިއަދު ގއ. ނިލަންދޫ ރައްޔިތުންނާ މުހާތަބުކުރައްވައި ދެއްކެވި ވާހަކަފުޅުގައެވެ.
ސަރުކާރުގެ އަމާޒަކީ، ދަނޑުވެރިކަމުގެ ސިނާޢަތުގެ ހިންގުން ހަރުދަނާކުރެއްވުން ކަމަށް ވިދާޅުވެ، ރާއްޖެއަށް ބޭނުންވާ މިންވަރަށް ރާއްޖޭގައި ކާބޯތަކެތި ހެއްދުމުގެ މަސައްކަތްވެސް މިހާރު ސަރުކާރުން ފައްޓަވައި، އިންވެސްޓަރުން ހޯދުމުގެ މަސައްކަތް ކުރައްވަމުންގެންދަވާ ކަމަށް ރައީސް ވިދާޅުވިއެވެ. އެ މަނިކުފާނު ވިދާޅުވީ، ދަނޑުވެރިކަމަކީ ރާއްޖޭގެ އިގްތިސާދު ސިންދަފާތުކުރުމަށް ބަލާއިރު ވަރަށް ބޮޑަށް ސަމާލުކަން ދެއްވާ ދާއިރާއެއްކަމަށެވެ. އެހެންކަމުން ނިލަންދޫގެ ދަނޑުވެރިންނާއި، ޖުމުލަކޮށް ރާއްޖޭގެ ދަނޑުވެރިންނަށް ދަނޑުވެރި އުފެއްދުންތަކުން ނަފާހޯދޭނޭކަން ރައީސް ފާހަގަކުރެއްވިއެވެ.
އެރަށެއްގެ އާބާދީއަށް އެކަށީގެންވާ ފެންވަރެއްގައި ހިދުމަތް ދެވޭ ތަނަކަށް އެރަށެއްގެ ސިއްހީ މަރުކަޒު ހެދުމުގެ ސިޔާސަތުގެ ދަށުން، ނިލަންދޫ ގައިވެސް ސިއްހީ ހިދުމަތްތައް ފުޅާކޮށްދެއްވާނޭކަމުގެ ޔަގީންކަން އެމަނިކުފާނު ދެއްވިއެވެ. އަދި ބަނދަރުގެ މައްސަލައިގައިވެސް، ރައްޔިތުން އުންމީދުކުރާ ފަދަ ޙައްލެއް ހޯއްދަވައިދެއްވާނޭކަމަށާއި، ރަށްގިރުމުގެ މައްސަލަ ހައްލުކުރުމާއި ފެނާއި ނަރުދަމާގެ މައްސަލަ ހުއްޓިފައި އޮތް އޮތުންވެސް ނިމުމަކަށް ގެންނަވާނޭކަމަށް ރައީސް ވިދާޅުވިއެވެ. މީގެއިތުރުން އެމަނިކުފާނު ވަނީ ނިލަންދޫ ސްކޫލްގައި މަލްޓިޕަރޕަސް ހޯލެއް ތަރައްގީ ކޮށްދެއްވާނޭކަމަށް ވިދާޅުވެ، ކެމްޕެއިން ތެރޭގައި ވެވަޑައިގެންނެވި ވަޢުދާ އެއްގޮތަށް އެ ވަޢުދުވެސް ފުއްދަވައިދެއްވާނޭކަމަށް ވިދާޅުވެފައެވެ.
ރައީސް ވިދާޅުވީ، ރަށުގެ ތަރައްޤީއަށް ކުރަން ހުރި ކަންތައްތަކަށް ސަމާލުކަން ދެއްވައިގެން ރައްޔިތުންގެ އުންމީދުތަކުގައި ހަގީގީ ކުލަ ޖައްސައިދެއްވާނޭކަމަށެވެ.
