ސްޕެނިޝް ސްޕަރ ކަޕުގެ ސެމީފައިނަލުގައި 2-0 އިން އެތުލެޓިކޯ ބިލްބާއޯ ބަލިކޮށް މަޝްހޫރު ބާސެލޯނާ ފައިނަލުން ރޭ ޖާގަ ހޯދައިފިއެވެ.
ސައުދީ އަރަބިއްޔާގައި ކުޅުނު މިމެޗުގައި ބާސެލޯނާއިން ލީޑް ނެގީ ލިގްމަންޓުގެ އަނިޔާއަށްފަހު މިހާރު ފިޓްވެފައިވާ ގަވީގެ ލަނޑުން މެޗުގެ 17 ވަނަ މިނެޓުގައެވެ. ލީޑް ފުޅާކުރީ ދެވަނަ ހާފުގެ ކުރީކޮޅު ހުނަރުވެރި ވިންގަރ ލަމީން ޔަމާލް ޖަހައިދިން ލަނޑުންނެވެ.
މެޗުގެ ބާސެލޯނާއިން ޑޮމިނޭޓް ކުރިނަމަވެސް ދެވަނަ ހާފުގައި ބިލްބާއޯ ފެނުނީ ވަރަށް ނުރައްކާތެރިކޮށެވެ. މެޗުގެ ފަހުބައިގެ ތެރޭގައި އެޓީމުން ދެ ލަނޑުވެސް ޖެހިއެވެ. އެކަމަކު ދެ ފަހަރުވެސް ރެފްރީ ނިންމީ އޮފްސައިޑް ކަމަށެވެ.
ސެމީގެ ދެވަނަ މެޗުގައި މިރޭ ރާއްޖޭ ގަޑިން ދަންވަރު 12 ޖަހާއިރު މަޝްހޫރު ރެއާލް މެޑްރިޑާއި މަޔަކޯ ބައްދަލު ކުރާނެއެވެ. ފައިނަލް މެޗް ކުޅުމަށްފަހު ހަމަޖެހިފައި ވަނީ އަންނަ އާދިއްތަ ދުވަހުއެވެ.
