ޔުނައިޓެޑް ކިންގްޑަމްގެ އިންޓަރނޭޝަނަލް ޑިވެލޮޕމަންޓްގެ ފަންޑުގެ ދަށުން ދިވެހިރާއްޖޭގައި ކުރިއަށް ގެންދާ މޯލްޑިވްސް ސެކިއުރިޓީ އެންޑް ޖަސްޓިސް ޕްރޮޖެކްޓްގެ ބައެއް ކަމުގައިވާ "ނެއިބަރހުޑް ޕޮލިސް ސްޓްރީމް" ގެ ހަރަކާތެއްގެ ގޮތުން އަވަށްޓެރި ފުލުހުންގެ ހިދުމަތަށް ހާއްސަ ތަމްރީނެއް ފަރުމާކުރުމަށް ބޭނުންވާ މައުލޫމާތު އެއްކުރުމަށްޓަކައި މަސައްކަތު ބައްދަލުވުމެއް ބާއްވައިފިއެވެ.
މި ޖަނަވަރީ މަހުގެ 7 އިން 8 އަށް " ޑިވެލޮޕިންގ އެންޑް ޑެލިވެރިންގ ނެއިބަރހުޑް ޕޮލިސިންގ އިން މޯލްޑިވްސް" ގެ ނަމުގައި ބޭއްވި މި މަސައްކަތު ބައްދަލުވުމުގައި މާލެ އަދި ހުޅުމާލެ ޕޮލިހުގެ އިތުރުން ހުރިހާ ރީޖަންތައް އަދި އެހެނިހެން ފްރޮންޓްލައިން ޑިޕާރޓްމަންޓްތަކާއި ޑައިރެކްޓަރޭޓް އޮފް އިންޓެލިޖެންސް އަދި ޕަބްލިކް ޓްރަސްޓް އެންޑް ކޮންފިޑެންސް ވިންގުން ބައިވެރިވެފައިވެއެވެ.
ފުލުހުން ބުނީ މި މަސައްކަތު ބައްދަލުވުމުގައި މޯލްޑިވްސް ސެކިއުރިޓީ އެންޑް ޖަސްޓިސް ޕްރޮޖެކްޓްގެ ދަށުން 2024 ވަނަ އަހަރު ކުރެވުނެ ދިރާސާ ރިޕޯޓްގައިވާ ހުށަހެޅުންތަކާއި، އަވަށްޓެރި ފުލުހުންގެ ހިދުމަތާއި ގުޅޭ (2024-2028) އިސްތިރާޖީ ތަސައްވުރާއި ހަރަކާތްތަކާއި، އަވަށްޓެރި ފުލުހުންގެ މަސައްކަތް މި ހުދުމަތުގައި ތަރައްޕޮގީ ވަމުން އައިސްފައިވާ ގޮތާއި، އަވަށްޓެރި ފުލުހުންގެ ހިދުމަތާއި ގުޅޭ ތަމްރީނުތައް މިހާރު ކުރިއަށް ގެންދެވޭ ގޮތްތަކުގެ އިތުރުން ސަރަހައްދާއި އާބާދީއާ ގުޅޭ ގޮތުން އަވަށްޓެރި ފުލުހުންގެ ހިދުމަތް ބައްޓަންކުރާނެ ގޮތާއި ގުޅޭ މައުލޫމާތު ހިއްސާކޮށްފައިވާ ކަމަށެވެ.
ދެ ދުވަހުގެ މުއްދަތަށް ކުރިއަށް ގެންދިޔަ މި މަސައްކަތު ބައްދަލުވުމުގައި ކޮންސްޓަބަލް އިން ފެށިގެން އިންސްޕެކްޓަރ އޮފް ޕޮލިސް ރޭންކާ ދެމެދުގެ 61 ފުލުހުންނާއި މާލެއާއި ރީޖަންތަކުން އޮންލައިންކޮށް 38 މުވައްޒަފުން ބައިވެރިވެފައިވެއެވެ.
