ހޮޓެލް އެސޯސިއޭޝަނުން އޮފް ލޮސް އެންޖެލިސް އިން އެ ސިޓީގައި ހޮޓެލްތަކުގައި ކޮޓަރިތައް ލިބެން ހުރިތަންތަނާ އަދަދުތައް އިއުލާން ކޮށްފިއެވެ. ކާރިސާއެއް ލައިގަނެފައި ވުމާއެކު ގިނަ ބަޔަކު ވަނީ ގެދޮރު ދޫކޮށް، ކުލީ ކޮޓަރިތަކަށް ބަދަލު ވެފައެވެ. އެމީހުން އެތަންތާނގައި މަސް ދުވަހަށް އުޅޭ ގޮތަށެވެ.
ކާރިސާތައް ދިމާވުމުން ގިނަފަހަރަށް އަގުތައް ހުންނަނީ ޑިސްކައުންޓު ރޭޓެއްގައި ހަމަޖައްސާފައެވެ.
އެސޯސިއޭޝަންގެ ބޯޑުން ނެރުނު ބަޔާނެއްގައި ބުނެފައި ވަނީ ގިނަ ހޮޓަލްތަކުން މީހުންގެ އޮޅު ޖަނަވާރުތައްވެސް ބަލައި ގަންނާނެ ކަމަށެވެ.
މިތަންތާނގައި ކާރިސާ ދިމާވާއިރު އަގުތައް ހުންނަންވީ ގޮތް އޮންނަނީ ޤާނޫނަކުން ކަނޑައަޅާފައެވެ.
އެގޮތުން، ކާރިސާއެއް އިއުލާން ކުރާ ހިސާބުން ފެށިގެން 30 ދުވަސް ވަންދެން ހޮޓަލާއި މޮޓެލް އަދި އެހެނިހެން ވަގުތީ ކުއްޔަށް ދޫކުރާ ގެދޮރުގެ އަގު 10 އިންސައްތައަށް ވުރެ ބޮޑުކުރުން މަނާވާނެއެވެ.
ހަމަ އެ ގާނޫނުގައި ބުނެފައި ވަނީ، ކައްކާ ގޭހާއި ދަތުރުފަތުރާއި ކާބޯތަކެއްޗާއި ކުއްލި ހާލަތުގައި ބޭނުންކުރާ ސާމާނާއި ސިއްހީ ސާމާނާއި އިމާރާތް ކުރުމަށް ބޭނުންވާ ސާމާނުގެ އަގުވެސް ބޮޑުކޮށްގެން ނުވާނެ ކަމަށެވެ.
އަގާ ކުޅޭ ފަރާތްތަކުގެ އަދަބަކީ، އެއް އަހަރު ދުވަހުގެ ޖަލު ހުކުމާއި 10،000 ޑޮލަރުން ޖޫރިމަނާ ކުރުމެވެ.
ލޮސް އެންޖެލިސް ސިޓީގައި 412 ހޮޓަލުގައި ކޮޓަރި ހުރިކަމަށް އިއުލާން ކޮށްފައި ވެއެވެ. އަދި މުޅި ކައުންޓީގައި 1،305 ހޮޓަލް ހުންނާނެ ކަމަށް ބުނެފައި ވެއެވެ. އޭގެ އިތުރުން މިތަންތާނގައި އެވަރެޖުކޮށް ދުވާލަކަށް ކޮޓަރިއެއް އުޅޭނީ 205 ޑޮލަރަށް ކަމަށްވެސް ބުނެފައި ވެއެވެ.
