ޕާކިސްތާންގެ ލާހޫރުގައި އަނެއްކާވެސް ވައި ނުސާފު ވެއްޖެއެވެ. އެ ސިޓީގެ ވައިގެ ކޮލިޓީ އިންޑެކްސް މިއަދު ހުރީ ނުރައްކާތެރި މިންވަރެއް ކަމަށްވާ، 431 ގައި ކަމަށް މުސުމާ ބެހޭ އިދާރާއިން ވަނީ ބުނެފައެވެ.
މި ނަންބަރަކީ މިއީ، ދުނިޔޭގެ ސިއްހަތު ޖަމިއްޔާ އިން ކަނޑައަޅާފައިވާ ސަލާމަތީ މިންގަނޑުތަކަށް ވުރެ 58 ގުނަ އިތުރު ތަޣައްޔަރުވުމެއް ކަމަށް ބެލެވެއެވެ.
އާންމުން ބޭރުގައި އުޅޭއިރު މާސްކު އެޅުން މަޖުބޫރުކޮށްފައި ވެއެވެ. އަދި ވައި ތަޣައްޔަރުވެގެން ނޭވާލުމުގެ ނިޒާމަށް އުދަގޫ ކުރާ މާއްދާތަކަށް ހުށަހެޅުން ކުޑަކުރުމަށްޓަކައި ކުޑަކުދިން ބޭރުގައި ނުގެންގުޅުމަށް ވެސް އިލްތިމާސްކޮށްފައި ވެއެވެ.
މި ފެންވަރެއްގައި ވައި ނުސާފުވުން ގިނަ ދުވަހަށް ހުރުމަކީ ސިއްހީ ގޮތުން ބޮޑެތި ގެއްލުންތަކެއް ލިބިދާނެ ކަމެއް ކަމަށްވެސް ޑޮކްޓަރުން ވަނީ ފާހަގަ ކޮށްފައެވެ.
