ކެލިފޯނިޔާގައި އަނދަމުންދާ ޕެލިސޭޑްސް އާއި އީޓަންގައި 9،000 އަށް ވުރެ ގިނަ ގެއާއި ގަނޑުވަރު އަނދައި ހުލިވެފައިވާ ކަމަށް ފުލުހުން ބުނެފިއެވެ. މި އިމާރާތްތަކުގެ ތެރޭގައި ވިޔަފާރި ޚިދުމަތްދޭ ތަންތަންވެސް ހިމެނެއެވެ.
ޕެލިސޭޑްސް ސަރަހައްދު ރޯވެގެން، 5،300 އެއްހާ އިމާރާތްތައް އަނދާފައިވާނެ ކަމަށް ބުނެއެވެ. އަދި އީޓަން ސަރަހައްދުން އިތުރު 4،000 އާއި 5،000 އާ ދެމެދުގެ ތަންތަން އަނދައިގެން ގޮސްފައިވާނެ ކަމަށް ލަފާކޮށްފައި ވެއެވެ.
ފުލުހުން މިއަންދާސާތައް ބިނާކޮށްފައި ވަނީ، ހެލިކޮޕްޓަރުގައި ދަތުރުކޮށް، މަތިން އިންފްރާރެޑް ޓެކްނޮލޮޖީ ބޭނުން ކޮށްގެންނެވެ.
މިހާތަނަށް ލަފާ ކުރެވެނީ އެންމެ 5 މީހުން މަރުވެފައިވާ ކަމަށެވެ. ނަމަވެސް މަރުވި މީހުންގެ އަދަދު އިތުރު ވާނެ ކަމަށް ބެލެވެއެވެ. އަދި އެއަދަދުތައް ޔަގީން ކުރެވޭނީ އަނދައިގެން ގޮސްފައިވާ ތަންތަނަށް ވަދެވިގެންނެވެ.
