ސްޕެނިސް ސްޕަރ ކަޕް ސެމީފައިނަލުގެ ދެވަނަ މެޗުގައި ރޭ މަޔޯކާ 0-3 އިން ބަލިކޮށް މަޝްހޫރު ރެއާލްމެޑްރިޑް ފައިނަލުން ޖާގަ ހޯދައިފިއެވެ.
ސައުދީ އަރަބިއްޔާގައި ކުޅުނު މިމެޗުގެ ފުރަތަމަ ހާފު ލަނޑެއް ނުޖެހި އެއްވަރުވެފައި އޮތުމުން ދެވަނަ ހާފް ފެށީ ވަރަށް ފޯރިގަދަކޮށެވެ. ރެއާލްއިން މަޔޯކާގެ ޑިފެންސްލައިން ފޫއަޅުވާލީ 60 ވަނަ މިނެޓުގައެވެ. މި ލަނޑު ކާމިޔާބު ކޮށްދިނީ ޖޫޑް ބެލިންގހަމްއެވެ. ގިނަ ފައުލްތަކެއް ފެނިގެންދިޔަ މެޗުގައި ރެއާލްއަށް ލީޑް ފުޅާކުރެވުނީ މެޗުގެ އިތުރުވަގުތުގައެވެ. އެއީ މަޔޯކާގެ މާޓިން ވަލްޖެންޓް އަތުން ބައިކޮޅަށް ވަން ލަނޑުންނާއި ރޮޑްރީގޯ ކާމިޔާބުކޮށްދިން ލަނޑުންނެވެ.
މިމެޗުގައި ރެއާލްގެ ވިނީޝިއަސް އާއި މަޔޯކާގެ ބައެއް ކުޅުންތެރިންނާދެމެދު ދަނޑުމަތިން، އަދި މެޗް ނިމިގެން ޓަނަލްތެރޭގައިވެސް ކޮންމެވެސް ވަރެއްގެ ހަމަނުޖެހުންތަކެއް ހިނގިއެވެ.
ސްޕެނިޝް ސްޕަރ ކަޕުގެ ފައިނަލުގައި ރެއާލްމެޑްރިޑް ނިކުންނާއި ވާދަވެރި ބާސެލޯނާއާ ދެކޮޅަށެވެ. ފައިނަލް މެޗް ކުޅުމަށް ހަމަޖެހިފައި ވަނީ އަންނަ އާދިއްތަ ދުވަހުގޭ ރާއްޖޭ ގަޑިން ދަންވަރު 12 ޖަހާއިރުއެވެ.
