ދުނިޔޭގެ ކޮންމެ ދެ މީހެއްގެ ތެރޭން އެކެއްގެ އަތުގައި ފޯނެއް އޮންނާނެއެވެ. އިންސާނުންނަށް އެއާ ނުލައި ނޫޅެވޭ މި އާލާތް މުހިންމު 10 ކުންފުންޏަކުން އުފައްދައި ބާޒާރަށް ނެރެއެވެ.
މުއްސަނދި މީހާ އޭނާގެ ހައިބަތަށްޓަކައި އަގު ބޮޑު ފޯނެއް ގެންގުޅެއެވެ. އެކަމަކު އެ ފޯނަކީ އޭގައި ހިމެނޭ ޓެކްނޮލޮޖީއާއި ފަސޭހަ މިންވަރަށް ބަލާއިރު އެހެން އެއްވެސް މީހަކަށްވެސް ގަނެވިދާނެ ވަރުގެ ފޯނެކެވެ. އެހެންނަމަވެސް އެ ފޯނު އަގު ބޮޑު ވަނީ އޭގެ ބޭރު ޖަރީކޮށްފައިވާ ގޮތުންނެވެ.
ދުނިޔޭގެ އެންމެ އަގު ބޮޑު ފޯނު ގެންގުޅެނީ އޭޝިއާގެ އެންމެ މުއްސަނދި މީހާގެ އަންހެނުންނެވެ.
އަގުބޮޑު މޯބައިލް ފޯނަކީ ނިއުޔޯކުގެ ކުންފުންޏަކުން ބަދަލު ގެނަސްގެން އުފައްދާ އެޕަލް އައިފޯނުގެ ވައްތަރެކެވެ. ފަލްކަން ސުޕަރ ނޯވާ އައިފޯން 6 ޕިންކް ޑައިމަންޑަކީ އެންމެ އަގު ބޮޑު ފޯނެވެ.
24 ކެރެޓްގެ ރަނުން ހަދާފައިވާ މި މޯބައިލްގެ ބޭރު ކަވަރު ޕިންކް ކުލައިގެ ބޮޑު ޖަވާހިރަކުން ޖަރީކޮށްފައި ވެއެވެ. އެހެންވެ، މި ފޯނު އެހެން ފޯނުތަކާ ތަފާތެވެ.
48.5 މިލިއަން އެމެރިކާ ޑޮލަރުގެ މި ފޯނު ގެންގުޅޭ ފަރާތަކީ، މުކޭޝް އަމްބާނީގެ އަނބިކަނބަލުން ނީޓާ އަމްބާނީ އެވެ. އަދި ބައެއް ގައުމުތަކުގެ ވެރިންނާއި ފިލްމީ ތަރިންނާއި އެހެން މުއްސަނދިންވެސް މި ކުންފުނިން އޯޑަރަށް ފޯނުތައް ހައްދައެވެ. ބޭނުންނަމަ ބޭރު ކަވަރު ސާފު ރަނުންވެސް ހަދާދެއެވެ.
އަނެއްކޮޅުން ދުނިޔޭގެ އެންމެ އަގު ހެޔޮ ފޯނުވެސް ލިބެނީ އިންޑިއާއިންނެވެ. އިންޑިއާގެ ކުންފުންޏެއް ކަމަށްވާ ރިންގިންގ ބެލްސް އިން އުފެއްދި "ފްރީޑަމް 251" އަކީ، އިންޑިއާގެ 251 ރުޕީސް (ދިވެހި 50) ރުފިޔާއަށް ލިބޭ ފޯނެކެވެ.
ސިޔާސީ ޕާޓީތަކުންއިންތިޚާބާ ދިމާކޮށް ޝިޕްމެންޓަކަށް އޯޑަރު ޖަހާލަން ބަޖެޓަށް ހެޔޮވަރު ފޯނެކެވެ.
