އެމެރިކާއިން ހަނގުރާމައިގެ ޖަރީމާތައް ހިންގައި ޒަޔަނިސްޓުންނަށް ވާގިވެރިވެ ފައިސާ އިސްރާފުކުރުމާ ދެކޮޅަށް ވާހަކަ ދައްކާ ފަރާތްތަކުން ބުނެފައި ވަނީ ކެލިފޯނިޔާގައި ރޯވެފައި ވަނީ އިޒްރޭލުން ޣައްޒާ ސުންނާފަތިކޮށްލުމުން ކަމަށެވެ.
އެކްޓިވިސްޓް ގްރޫޕެއް ކަމަށްވާ ކޯޑް ޕިންކް އިން އިންސްޓަގްރާމްގައި ބުނެފައިވަނީ، "ޣައްޒާގައި ދިރިތިބި މީހުން އަންދާލުމަށް އެމެރިކާގެ މީހުންގެ ޓެކްސް ފައިސާއިން ޚަރަދު ކުރާއިރު އެ ކާރިސާގެ ރަހަ އެމެރިކާ މީހުންނަށް ލިބިގެން ދިއުމަކީ ހައިރާން ވާން ޖެހޭ ކަމެއް ނޫން" ކަމަށެވެ.
ޒަޔަނިސްޓުންނާ ދެކޮޅަށް މަސައްކަތް ކުރާ ޔަހޫދީ ޖަމާއަތެއް ކަމަށްވާ، ވޮއިސް ފޯ ޕީސްގެ ނިއުޔޯކް ބްރާންޗުން ކެލިފޯނިޔާގެ އަލިފާނާ ބެހޭ ގޮތުން، އިންސްޓަގްރާމް ޕޯސްޓެއްގައި ބުނެފައި ވަނީ، "އަހަރެމެންގެ ގައުމު، އެމެރިކާގައި މީހުންނަށް ހަމަ ނޭވާލައިގެން އުޅެވޭ ގޮތް ހެދުމުގެ ބަދަލުގައި އަހަރަމެންގެ ސަރުކާރުން ދަނީ، ޣައްޒާގައި އިޒްރޭލުން ފަލަސްތީނު މީހުންގެ ނަސްލު ނައްތާލުމަށް ބިލިއަން ޑޮލަރު ދެމުން" ކަމަށެވެ.
ނިއުޔޯކުގައި މަސައްކަތް ކުރާ ޒަޔަނިސްޓުންގެ ޖަރީމާތައް ބޭޒާރު ކުރާ އެންޖީއޯ "ވިތު އިން އަވަރ ލައިފްޓައިމް" ގެ ލީޑަރު ފާތިމާ މުހައްމަދު ވަނީ ކެލިފޯނިޔާ އަލިފާނުގެ ފޮޓޯއެއް ޕޯސްޓްކޮށް، "ޣައްޒާގެ އަލިފާންގަނޑު އެހިސާބުގައި ހުއްޓިފައި ނޯންނާނެ" ކަމަށް ބުނެފައެވެ.
