ޒަޔަނިސްޓު ހަނގުރާމައިގެ މުޖުރިމުން ކަމަށްވާ ނަތަންޔާހޫއާއި ގަލަންޓު ހައްޔަރުކުރުމަށް އިންޓަރނޭޝަނަލް ކްރިމިނަލް ކޯޓުން އަމުރު ނެރުމުން އެ ކޯޓާއި ފަނޑިޔާރުންނަށް ނުފޫޒު ފޯރުވުމަށް އެމެރިކާއިން މަސައްކަތް ފަށައިފިއެވެ.
އެމެރިކާގެ ހައުސް އޮފް ރެޕްރެޒެންޓޭޓިވްސް އިން ބުރާސްފަތި ދުވަހު ވަނީ އައިސީސީއާއި ފަނޑިޔާރުންނާ ދެކޮޅަށް ފިޔަވަޅު އެޅުމަށް ފާސްކޮށްފައެވެ.
ހައުސް އޮފް ރެޕްރެޒެންޓެޓިވްސްގެ މެމްބަރުން ވަނީ "އިލެޖިޓިމޭޓް ކޯޓް ކައުންޓަރެކްޝަން އެކްޓް" ގެ ނަމުން ކޯޓަށް ފިޔަވަޅު އެޅުމަށް ގާނޫނެއް ފާސްކޮށްފައެވެ.
އެމެރިކާ ކޮންގްރެސްއަކީ ނަތަންޔާހޫގެ ހަނގުރާމައިގެ ޖަރީމާތަކަށް ސަޕޯޓުކޮށް އޭނާއަށް ކުރުނީސް ކުރި މަޖިލީހެވެ!
"އެމެރިކާގެ އެއްވެސް ހިމާޔަތެއް ލިބިފައިވާ މީހެއްގެ ތަހުގީގެއް ހިންގައި، ހައްޔަރުކޮށް، ބަންދުކޮށް ނުވަތަ ދައުވާ ކުރުމަށް ކުރާ މަސައްކަތެއް ކުރިއަށް ގެންދާ އައިސީސީގެ އެއްވެސް އޮފިޝަލަކަށް ނުވަތަ އެ ކޯޓުގެ މަސައްކަތަށް ތާއީދުކުރާ ފަރާތަކަށް ދަތިކުރުމުގެ ފިޔަވަޅު އެޅޭނެ" ކަމަށް ފާސްކޮށްފައި ވެއެވެ.
މި ބިލު ދެން ދާނީ ސެނެޓަށެވެ. ނަމަވެސް ސެނެޓުގައި މިބިލު ފާސްކުރަން އުދަގޫވެދާނެ ކަމަށް ބެލެވެއެވެ. ނަމަވެސް އެމެރިކާ ސަރުކާރާއި ގާނޫނު ހަދާމަޖިލީހުގެ މެމްބަރުންނަކީ ދުނިޔޭގެ އާޖުފާދު ނުދަންނަ ބައެއް ކަމުން ކޮންމެ ފަދަ ގޮތަކަށްވެސް ފާސްވުމަކީ އެކަށީގެންވާ ކަމެކެވެ.
