ޕެރިހުގެ ބޮޑު މިސްކިތާއި އެ މިސްކިތާއި ގުޅިފައިވާ ހުރިހައި މިސްކިތެއްގައި ފްރާންސްގެ އަމަންއަމާން ކަމާއި ތަނަވަސްކަމަށް ދުއާ ކުރުމަށް އެ މިސްކިތުގެ އިމާމު ޝަމްސުއްދީން ހަފީޒް ހުރިހައި އިމާނުންނަށް އަންގައިފިއެވެ. އަދި ފުރަތަމަ ފަހަރަށް މި ދުއާކޮށްފައި ވަނީ މި ހުކުރުގައެވެ.
ޕެރިސްގެ ބޮޑު މިސްކިތާ ގުޅުން ހުރި 150 މިސްކިތް ފްރާންސްގެ އެކި ހިސާބުތަކުގައި ގާއިމް ކޮށްފައި ވެއެވެ.
އިމާމުންނަށް ބުރާސްފަތި ދުވަހު ފޮނުއްވި ސިޓީއެއްގައި ހަފީޒު ވަނީ "ކޮންމެ ހުކުރު ޚުތުބާއެއްގައި އަރަބި ބަހާއި ފަރަންސޭސި ބަހުން ދުއާ ކުރުމަށް" އެދިފައެވެ.
ހުށަހަޅާފައިވާ ދުޢާއަކީ: "ހައްދަވައި ގެންގުޅުއްވާ އިލާހު! ފްރާންސާއި، އެ ޤައުމުގެ ހުރިހާ ރައްޔިތުންނާއި، ޖުމްހޫރިއްޔާގެ މުއައްސަސާތައް ރައްކާތެރިކޮށްދެއްވައި، ފްރާންސަކީ، ހުރިހާ ދަރިކޮޅުގެ މީހުންނާއި ހުރިހައި ޖަމާޢަތެއް، އަދި ހުރިހާ ދީންތަކުގެ މީހުންނާއެކު، ސަލާމަތާއި ސުލްޙަވެރިކަމުގައި އެއްތަނެއްގައި ރައްޔިތުން އުޅޭ ރައްކާތެރި ޤައުމަކަށް ހައްދަވާދޭނވެ!"
ފްރާންސްގެ އެހެން ބައެއް މިސްކިތްތަކުގައި 2020ން ފެށިގެން ފްރާންސަށް ދުއާ ކުރަން ފަށާފައި ވެއެވެ. އަދި ފަހުން 7 އޮކްޓޯބަރުގެ އަޤްސާ ޠޫފާނަށް ފަހުވެސް އެހެން ބައެއް މިސްކިތްތަކުގައި ފަށާފައި ވެއެވެ.
ހަފީޒްގެ ސިޓީގައި ބުނެފައި ވަނީ އެހެން ދީންތަކުގެ މީހުން މިގޮތަށް ދުއާ ކުރާތާ އެތައް އަހަރެއް ވެފައިވާ ކަމަށެވެ.
ފްރާންސްގައި ދެވަނައަށް އެންމެ ބޮޑު ދީނަކީ އިސްލާމް ދީނެވެ.
ޕެރިހުގެ ބޮޑު މިސްކިތަކީ ތާރީޚީ ގޮތުން އަލްޖީރިއާއާ ގުޅިފައިވާ މިސްކިތެކެވެ.
