ހުޅުމާލެ ފޭސް 2 ގައި ސްޓެލްކޯއިން ކަރަންޓް ދިނުމަށް ބަހައްޓާފައި ހުރި ކަރަންޓު ޓްރާންސްފޯމަރުތަކަކަށް ބަޔަކު ރޭ ބޮޑެތި ގެއްލުންތަކެއް ދީފިއެވެ.
އެކްސްގައި މިއަދު ސްޓެކްކޯގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވީ ހުޅުމާލެ ފޭސް 2 ގައި ހުންނަ ހައި-ވޯލްޓޭޖް (އެޗްވީ) ދެ ޓްރާންސްފޯމަރަކަށް ބަޔަކު ގަސްދުގައި ގެއްލުން ދިނުމުގެ ސަބަބުން ކަރަންޓު ވިއުގައަށް ބޮޑެތި ދަތިތަކާ ކުރިމަތިވެފައިވާ ކަމަށެވެ.
ޓްރާންސްފޯމަރުތައް ބަހައްޓާފައި ހުރި ތަނަކީ، ތަނުގެ ވަށައިގެން ފާރެއް ލައި، ޑަބަލް ލޮކެއް ވެސް ލައި ސެކިއުރިޓީ ވަރުގަދަކޮށްފައި ހުރި ތަނެކެވެ. އެމްޑީ ފަހުމީ ވިދާޅުވީ ތަޅު ހަލާލުކޮށްލައިގެން އެތަނަށްވެ އެޗްވީ ސިސްޓަމަށް ގެއްލުންދިނީ "މިކަމުގެ އިލްމު" ހުރި ބައެއް ކަމަށް ތުހުމަތު ކުރައްވާފައެވެ.
"ޓްރާންސްފޯމަރުތަކަށް ގެއްލުން ދޭން އުޅެނިކޮށް މިދިޔަ އަހަރު ބަޔަކު މަރުވި، މި ކަހަލަ އަމަލުތަކުގެ ސަބަބުން މިފަދަ ހިތާމަވެރި ހާދިސާތަކެއް އަނެއްކާވެސް ތަކުރާރުވެދާނެ. މައްސަލައިގެ ތަހުގީގު ދަނީ ކުރިއަށް. ކުރިމަގުގައި މި ކަހަލަ ކަންކަން ހުއްޓުވުމަށް ފިޔަވަޅުތަކެއް އަޅަން މަޖުބޫރުވާނެ" އެމްޑީ ފަހުމީ ވިދާޅުވި އެވެ.
