އައްޑޫ ސިޓީގެ ގުޅިފައިވާ ރަށްތަކަށް ކަރަންޓު ދިނުމަށް ޤާއިމްކޮށްފައިވާ އައްޑޫ ސީ.ޕީ.އެސްގެ ޖެންސެޓްތަކަކަށް މައްސަލަ ދިމާވެ، އެ ސިޓީގައި ދެމުންގެންދާ ކަރަންޓުގެ ޚިދުމަތަށް ބުރޫއަރާފައިވާތީ އެމައްސަލަ ހައްލުކުރުމަށް މަސައްކަތް ކުރަމުންދާކަމަށް ފެނަކަ ކޯޕަރޭޝަނުން މިއަދު ނެރުނު ނޫސް ބަޔާނެއްގައި ވިދާޅުވެފައިވެއެވެ.
މި މައްސަލަ ޙައްލުކުރުމަށްޓަކައި، ޖެންސެޓްތަކަށް ބޭނުންވާ ސްޕެއަރ ޕާޓްސް ހޯދުމުގެ މަސައްކަތް މިހާރުވެސް ދަނީ ކުރަމުންކަމަށް ފެނަކައިން ވިދާޅުވެފައިވެއެވެ. އަދި ސްޕެއަރ ޕާޓްސް ލިބި، 1 ޖެންސެޓުގެ މައްސަލަ މާދަމާ ޙައްލު ކުރެވޭނެކަމަށާއި، ސްޕެއަރ ޕާޓްސް ލިބުނުހާ އަވަހަކަށް، ދެން ހުރި ޖެންސެޓްތައް ހައްލު ކުރުމުގެ މަސައްކަތް ކުރެވޭނެކަމަށްވެސް ފެނަކައިން މަޢުލޫމާތު ދީފައިވެއެވެ.
މި މައްސަލަ ފުރިހަމައަށް ޙައްލު ކުރެވެންދެން، ކަރަންޓު ލޯޑް ހެފެހެއްޓުމަށްޓަކައި، ގުޅިފައިވާ ރަށްތަކުގެ އެކި ސަރަހައްދުތަކުން، އެކުލަވާލެވޭ ތަވަލާއި އެއްގޮތަށް، ކަރަންޓު ކެނޑުމަށް ހަމަޖެހިފައިވާކަމަށް ފެނަކައިން ވިދާޅުވެފައިވެއެވެ. އަދި މިކަމުގެ ސަބަބުން އައްޑޫ ސިޓީގެ ގުޅިފައިވާ ރަށްތަކުގެ ރައްޔިތުންނަށް ދިމާވާނެ ދަތިތަކަށް އެކުންފުނިން މަޢާފަށް އެދިފައިވެއެވެ.
ފެނަކައިން އިތުރަށް ވިދާޅުވެފައިވަނީ މި މައްސަލަ ވީހާވެސް އަވަހަކަށް ޙައްލުކޮށް ކަރަންޓުގެ ޙިދުމަތް އާއްމު ހާލަތަށް ގެނައުމަށްޓަކައި، އެ ކުންފުނީގެ ޓީމުތަކުން މެދުނުކެނޑި މަސައްކަތް ކުރަމުން ދާނެކަމަށެވެ. އަދި މިފަދަ ދަނޑިވަޅުތަކުގައި ރައްޔިތުންގެ ފަރާތުން ދެއްވާ އެއްބާރުލެއްވުމަށް ފެނަކައިން ޝުކުރު ދަންނަވާފައިވެއެވެ.
