އިނގިރޭސި ޕްރިމިއަރ ލީގުގެ ތާވަލުގެ ކުރީގައި އޮތް ލިވަޕޫލާ 1-1 އިން ނޮޓިންހަމް ފޮރެސްޓުން ރޭ އެއްވަރުކޮށްފިއެވެ.
ފޮރެސްޓުގެ ދަނޑުގައި ކުޅުނު މިމެޗުގައި 8 ވަނަ މިނެޓުގައި ލަނޑުޖަހައި ލީޑް ނެގީވެސް އެޓީމުންނެވެ. މިލަނޑު ކާމިޔާބު ކޮށްދިނީ މިސީޒަނުގައި ވަރަށް ރަނގަޅު ފޯމެއްގައި ހުރި ކްރިސް ވުޑެވެ. ނަތީޖާ ހަމަހަމަކުުރުމަށް ލިވަޕޫލުން ކުރަމުންދިޔަ މަސައްކަތް ކާމިޔާބުވީ 66 ވަނަ މިނެޓުގައި ޕޯޗުގަލްގެ ފޯޗާޑް ޑިއޭގޯ ޖޮޓާގެ ލަނޑުންނެވެ. ޖޮޓާ މިލަނޑު ޖެހީ އޭނާ ކުޅެން އެރިތާ އެންމެ 22 ސިކުންތު ތެރޭގައެވެ. މިއީ ލިވަޕޫލުގެ ތާރިހުގައި ކުޅެން ނިކުތްތާ އެންމެ އަވަހަށް ކުޅުންތެރިޔަކު ޖެހި ލަނޑެވެ.
ގިނަވަގުތު ބޯޅަ ހިފަހައްޓައިގެންކުޅެ، ލިވަޕޫލުން 23 ހަމަލާ އުފެއްދިއެވެ. އެކަމަކު މީގެތެރެއިން ގޯލަށް އަމާޒުވީ 7 ހަމަލާއެވެ.
މިމެޗުން ލިބުނު އެއްޕޮއިންޓާއެކު ތާވަލުގެ ކުރީގައި ލިވަޕޫލް އޮތީ 47 ޕޮއިންޓް ހޯދައިގެންނެވެ. ދެވަނައިގައި ފޮރެސްޓް އޮތީ 41 ޕޮއިންޓާއެކުއެވެ. އާސެނަލް ތިންވަނައިގައި އޮތީ 40 ޕޮއިންޓާއެކުއެވެ. އެންމެފަހުގެ ޗެމްޕިއަން މެންޗެސްޓަރ ސިޓީ 35 ޕޮއިންޓާއެކު އޮތީ 6 ވަނައިގައެވެ.
