އެޕަލް ކުންފުނިން 12.8 ބިލިއަން ޑޮލަރުގެ އައިފޯނު 2024ގައި އިންޑިއާއިން އެކްސްޕޯޓު ކޮށްފިއެވެ. މިއީ މިދިޔަ އަހަރާ އަޅާބަލާއިރު 48 ޕަސެންޓް އިތުރު އަދަދެކެވެ.
2023 ވަނަ އަހަރު އެޕަލް އިން އެކްސްޕޯޓު ކޮށްފައިވަނީ އިންޑިއާއިން، 9 ބިލިއަން ޑޮލަރުގެ ފޯނެވެ. މިއަހަރު 12.8 ބިލިއަން ޑޮލަރުގެ ފޯނު އެކްސްޕޯޓު ކުރުމަކީ އިންޑިއާއިން އެކްސްޕޯޓްކުރި އެއްވެސް އުފެއްދުމަކަށް މިވަރުގެ ކުރިއެރުމެއް ނުލިބެއެވެ.
މިކާމިޔާބީއަކީ، އިންޑިއާއިން ގެންގުޅޭ، އުފެއްދުންތެރިކަމަށް ހިތްވަރު ދޭ، ޕްރޮޑަކްޝަން ލިންކްޑް އިންސެންޓިވް (ޕީއެލްއައި) ސްކީމަށް ލިބުނު ކާމިޔާބީއެއް ކަމަށް ބަލާފައި ވެއެވެ.
މިހާރު އިންޑިއާގައި އުފައްދާ ފޯނުތައް ބޭރުން ގެންނަ ބައިތަކުން އެސެމްބަލް ކުރުމުގެ އިތުރުން އިންޑިއާގައި އުފައްދާ ބައިތައް ހިމަނާ މިންވަރުވެސް އިތުރު ވެގެން ގޮސްފައި ވެއެވެ. އުފެއްދުންތެރިކަމަށް ހިތްވަރު ދިނުމުގެ ސްކީމުގެ ދަށުން އިންޑިއާގައި ފޯނު އުފައްދަން ފެށިއިރު އިންޑިއާގައި އުފައްދާ ބައިތައް އުޅުނީ، 5 ޕަސެންޓާއި 8 ޕަސެންޓާ ދެމެދުގައެވެ. ނަމަވެސް މިހާރު 20 ޕަސެންޓަށް އެބައިތައް އިތުރު ވެގެން ގޮސްފައި ވެއެވެ.
އިކޮނޮމިކް ޓައިމްސްގެ ރިޕޯޓުގައި ބުނާ ގޮތުން އައިފޯނުގެ އުފެއްދުން މިއޮތް ގޮތަށް ކުރިއަށްދާނަމަ، އެޕަލް އިން އަހަރަކު 30 ބިލިއަން ޑޮލަރުގެ ފޯނު އުފައްދާނެއެވެ. އަދި އޭގެ 26 ޕަސެންޓް ވެގެންދާނީ އިންޑިއާގެ ޙިއްސާއަށެވެ.
މިހާރު އިންޑިއާއަކީ ދުނިޔޭގެ ދެވަނައަށް އެންމެ ބޮޑު ސްމާޓް ފޯނު މާކެޓެވެ. މިއަހަރު އިންޑިއާގައި އެޕަލް ފޯނުގެ ވިޔަފާރި، 20 ޕަސެންޓު ނޫނީ 15 މިލިއަން ޔުނިޓަށް އިތުރު ވާނެ ކަމަށް ލަފާ ކުރެވެއެވެ.
