ކެމްބްރިޖް އިންޓަނޭޝަނަލް (ސީއައިއޭ) ލެވެލްގެ ތަޢުލީމީ މާއްދާތަކަށް ފޮތް ލިޔުމުގެ ފުރުޞަތު ދިވެހި މުދައްރިސުންނަށް ހުޅުވާލުމަށް ނިންމާފައިވެއެވެ. މި މަޢުލޫމާތު ހާމަކުރެއްވީ މިނިސްޓަރ އޮފް އެޑިޔުކޭޝަން، ޑރ. އިސްމާޢީލް ޝަފީޢުއެވެ.
މިނިސްޓަރު ވިދާޅުވި ގޮތުގައި، ދިވެހިރާއްޖޭގެ އިސްކޫލުތަކުގައި ކެމްބްރިޖް އިންޓަނޭޝަނަލް (ސީއައިއޭ) އެގްޒަމިނޭޝަން ތަޢާރަފުކުރެވުނުތާ 23 އަހަރު ވެފައިވާއިރު، މިހާތަނަށް ބޭނުންކުރެވެމުން އައީ ބޭރުން އެތެރެކުރެވޭ ފޮތްތަކެވެ. ނަމަވެސް، ދިވެހި މުދައްރިސުންގެ ކިބައިގައި ކެމްބްރިޖް އިމްތިޙާނުގެ މުޤައްރަރުތަކަށް ފެންވަރު ރަނގަޅު ފޮތްތަކާއި ޑިޖިޓަލް ކޮންޓެންޓު އުފެއްދުމުގެ ޤާބިލުކަން ހުރި ކަމަށް މިނިސްޓަރު ޤަބޫލުކުރައްވާ ކަމަށް ވިދާޅުވިއެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، މިހާރު ގިނަ އިސްކޫލުތަކުގައި ދަރިވަރުން ބަރޯސާވަނީ ރާއްޖޭގެ މުދައްރިސުން ތައްޔާރުކޮށްދޭ ނޯޓުތަކަށެވެ. އަދި ބޭރުން ގަނެގެން މިހާރު ދެވޭ މަސައްކަތު ފޮތްތަކަށްވުރެ މާ ފެންވަރު ރަނގަޅު، ސީދާ އިމްތިހާނަށް އަމާޒުކުރެވިފައިވާ ފޮތްތައް ވެސް ރާއްޖޭގެ މުދައްރިސުން ތައްޔާރުކޮށްފައިވާކަން ފާހަގަކުރެއްވިއެވެ.
ކުރިއަށް އޮތް ހަފުތާގައި ފޮތްތައް ލިޔުމަށް ޝައުޤުވެރިވާ ފަރާތްތަކަށް ފުރުޞަތު ހުޅުވާލުމަށް ނިންމާފައިވާ ކަމަށް މިނިސްޓަރު ވިދާޅުވިއެވެ. މީގެ އިތުރުން، ފަރުދުންނަށާއި ޓީމުތަކަށް ފޮތްތަކާއި ޑިޖިޓަލް ކޮންޓެންޓު ތައްޔާރުކޮށް ވިއްކުމަށް ހުށަހެޅިދާނެ ކަމަށާއި، މި މަސައްކަތުގައި ތަޖުރިބާހުރި މުދައްރިސުން އިސްނެންގެވުމަށް ވެސް މިނިސްޓަރު އިލްތިމާސްކުރެއްވިއެވެ.
މި ފުރުޞަތު ހުޅުވާލުމުން، ދިވެހި މުދައްރިސުންނަށް އެމީހުންގެ ހުނަރާއި ތަޖުރިބާ ބޭނުންކޮށްގެން ރާއްޖޭގެ ތަޢުލީމީ ދާއިރާއަށް އިތުރު ހިއްސާއެއް ކުރުމުގެ މަގު ފަހިވެގެންދާނެ ކަމަށް ބެލެވެއެވެ.
