ރ. ފައިނު ނެރުން ވަންނަން އުޅުމުގެ ތެރޭގައި ނެރު ފައިކަށްޓަށް އަރައި، ބަނޑުފިލައިން ފަޅައިގެން ގޮސް ދިޔަވަމުންދިޔަ ދޯންޏަކަށް އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑް ފަސްޓް ސްކޮޑްރަންއިން އިއްޔެ އެހީތެރިކަން ފޯރުކޮށްދީފިއެވެ.
އެމްއެންޑީއެފްއިން މަޢުލޫމާތު ދެއްވިގޮތުގައި، "މިނާ" ނަމަކަށް ކިޔާ ސަޕްލައި ދޯނީގެ ބަނޑުފިލައިން ގާތްގަނޑަކަށް ދެ ފޫޓުގެ ތަނެއް ފަޅައިގެން ގޮސް ދިޔަވަމުންދާ ކަމުގެ މަޢުލޫމާތު އެމްއެންޑީއެފް ކޯސްޓްގާޑަށް ލިބުނީ ޖެނުއަރީ 13 ވަނަ ދުވަހުގެ 13:46 ހާއިރުއެވެ. މި މަޢުލޫމާތު ލިބުމާއެކު، އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑް ފަސްޓް ސްކޮޑްރަންގެ ހާބަރކްރާފްޓް، ޑައިވަރުންގެ ޓީމަކާއެކު ވަނީ އެ ސަރަހައްދަށް ގޮސް އެހީތެރިކަން ފޯރުކޮށްދިނުމުގައި ހަރަކާތްތެރިވެފައެވެ.
ކޯސްޓްގާޑުން ފޯރުކޮށްދިން އެހީތެރިކަމުގެ ތެރޭގައި، ދޯނީގައި ހެދެމުންދިޔަ ދިޔަގަނޑު ހިއްކުމަށް ޕަންޕު ބޭނުންކުރުމާއި، ޑައިވަރުންގެ ޓީމުން ދޯނީގެ ބަނޑުފިލައިން ފަޅައިގެން ގޮސްފައި ހުރި ތަނުގައި ފިލާ ޖަހައި ބައްދާދިނުން ހިމެނެއެވެ.
މި ހާދިސާ ހިނގީ ރ. ފައިނު ނެރުން ވަންނަން އުޅުމުގެ ތެރޭގައި ދޯނި ނެރު ފައިކަށްޓަށް އެރުމުންނެވެ. އެމްއެންޑީއެފްގެ އަވަސް އަދި ހަރުދަނާ ފިޔަވަޅުތަކުގެ ސަބަބުން، އިތުރު ގެއްލުމަކާ ނުލައި މި ހާދިސާ ވަނީ ކޮންޓްރޯލް ކުރެވިފައެވެ.
