އިޒްރޭލުގެ ކެބިނެޓުން ހަނގުރާމަ ހުއްޓާލުމުގެ އެއްބަސްވުމަށް ބަހުސްކުރަން ފަށައިފިއެވެ. އަދި ފަލަސްޠީނުންވެސް ދަނީ، އިޒްރޭލުން ވަގަށް ނަގާފައިވާ ފަލަސްޠީނު މީހުން މިނިވަން ކުރާއިރު އެމީހުންގެ ހެލްތު ޗެކަޕް ހަދާނެ ގޮތަކާ މެދު ވިސްނަމުންނެވެ.
އިޒްރޭލުގެ ޖަލުތަކުން މީހުން މިނިވަން ކޮށްލާއިރު، އެމީހުންގެ ކިބައިގައި ޖިންސީ ބައްޔެއް ހުރިތޯ ބެލުމާއި އަންހެން އަސީރުން ބަނޑުބޮނޑުތޯ ބެލުންވެސް އޮވެއެވެ. އިޒްރޭލުން ވަގަށް ނަގައިގެން ޖަލުތަކުގައި ގެންގުޅޭ މީހުންނަކީ، ރޭޕް ކުރުމުގެ ޝިކާރައަކަށް ވާމީހުން ކަމަށް އިންސާނީ ހައްގުތަކާ ބެހޭ ޖަމާއަތްތަކުން ބުނެއެވެ. ޖަލު ބަލަހައްޓާ ޒަޔަނިސްޓު އަންހެނުން ފިރިހެން ގައިދީން ރޭޕް ކުރުމާއި އަދި ފިރިހެން ޤައިދީންނާއެކު ލިވާޠުގެ އަމަލުތައް ހިންގައިގެން އިންސާނީ ހައްގުތަކާ ބެހޭ ފަރާތްތަކުން ޝަކުވާ ކޮށްފައި ވެއެވެ.
އިޒްރޭލުން ވަގަށް ނަގާފައިވާ ހާހެއްހައި ފަލަސްޠީނު މީހުން މިނިވަން ކުޜާނެ ކަމަށް ލަފާ ކުރެވެއެވެ. އެއިން ގިނަ މީހުންނަކީ ދިގު މުއްދަތަކަށް އިޒްރޭލުން ވަގަށް ނަގައިގެން ގެންގުޅުނު މީހުންނެވެ.
ފަލަސްޠީނުން އާދަވެގެން ހަސްފަތާލުތަކުން ހަދާ ޓެސްޓްތައް ހަދަން ބޭނުންވިނަމަވެސް ޒަޔަނިސްޓުން ހަސްފަތާލުތައް ނައްތާލައި ސިއްޙީ ފަރުވާދޭ މީހުން ވަގަށް ނަގާފައި ވުމުން ފަލަސްޠީނަށް މިފަދަ ޓެސްޓްތައް ހަދަން އުދަގޫ ވާނެއެވެ. މިސްރުން ދަނީ ރަފަހަ ބޯޑަރުގައި ވަގުތީ ފަރުވާގެ ފޭލިގެތައް ޖަހައި ތައްޔާރު ކުރަމުންނެވެ.
