އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ މައްޗަށް ކޮށްފައިވާ ހަނގުރާމައިގެ ޖަރީމާތަކުގެ ދައުވާ ކުރަން ނިންމި ނިންމުން ދިފާއުކޮށް އިންޓަނޭޝަނަލް ކްރިމިނަލް ކޯޓުގެ ޗީފް ޕްރޮސެކިއުޓަރު ކަރީމް ޚާން ވާހަކަ ދައްކަވައިފިއެވެ. އޭނާ ވިދާޅުވީ އެ ތުހުމަތުތައް އަމިއްލައަށް ތަހުގީގު ކުރުމަށް އިސްރާއީލުން "އިޚުލާސްތެރި މަސައްކަތެއް ނުކުރާ" ކަމަށެވެ.
ރޮއިޓާސްއަށް ދެއްވި އިންޓަވިއުއެއްގައި ޚާން ވިދާޅުވީ އެމެރިކާއިން ދުނިޔޭގެ ކްރިމިނަލް ކޯޓަށް ނުފޫޒު ފޯރުވުމަށް މަސައްކަތް ކުރިނަމަވެސް، ނަތަންޔާހޫ ހައްޔަރު ކުރުމުގެ އަމުރެއް ނެރުމަށް ނިންމި ނިންމުން ދަމަހައްޓަވާނެ ކަމަށް ވިދާޅުވެފައެވެ.
ހޭގްގައި ހުންނަ ބައިނަލްއަގްވާމީ ކްރިމިނަލް ކޯޓުގެ ފަނޑިޔާރުން ވަނީ ހަނގުރާމައިގެ ޖަރީމާތަކާއި އިންސާނިއްޔަތާ ދެކޮޅަށް ހިންގި ޖަރީމާތަކުގެ ތުހުމަތުގައި ނަތަންޔާހޫ އާއި އިސްރާއީލުގެ ކުރީގެ ޑިފެންސް މިނިސްޓަރު ޔޯވް ގަލަންޓް ހައްޔަރު ކުރުމަށް އަމުރު ވެރެފައެވެ.
ބައިޑެންގެ ވެރިކަމުގައި އެމެރިކާއިން ބައިނަލްއަގްވާމީ ޖިނާއީ ކޯޓަށް ފިއްތުމަށް ގާނޫނެއް ފާސްކުރިނަމަވެސް ޓްރަމްޕްގެ ވެރިކަމުގައި ކުރިންވެސް ވަނީ ކޯޓަށް ނުފޫޒު ފޯރުވަން މަސައްކަތް ކޮށްފައެވެ.
ޓްރަމްޕްގެ ވެރިކަމުގައި އެ ކޯޓަށް ދަތިކުރުމުގެ ފިޔަވަޅުތައް އަޅާފައި ވަނީ 2020 ވަނަ އަހަރު އެވެ. އެ ފިޔަވަޅު އެޅީ އަފްޣާނިސްތާންގައި އެމެރިކާއިން ހިންގި ހަނގުރާމައިގެ ޖަރީމާތައް ތަހުގީގު ކުރަން އުޅުމުންނެވެ. އެކަމަކު މި ދަތިކުރުމުގެ ފިޔަވަޅުތައް ޖޯ ބައިޑަންގެ ރިޔާސީ ދައުރުގައި އުވައިލިއެވެ.
އޭރު އެޅި ފިޔަވަޅުތަކުގައި، ކުރީގެ އައިސީސީގެ ޕީޖީ ފައްތޫ ބެންސޫދާ އާއި އެހެން މުވައްޒަފުންގެ ކްރެޑިޓް ކާޑާއި ބޭންކް އެކައުންޓްތައް ފްރީޒްކޮށް އެމެރިކާއަށް ދަތުރުކުރުން މަނާ ކުރިއެވެ.
ޓްރަމްޕްގެ މި ދައުރުގެ ވެރިކަމުގައި އެމެރިކާއިން އަޅާ ދަތިކުރުމުގެ ފިޔަވަޅުތައް ކުރިއަށް ވުރެ ހަރުކަށިވެފައި ފުޅާ ވާނެ ކަމަށް ގިނަ ބަޔަކު ލަފާކުރެ އެވެ.
