އޯޝަން ކަންޓްރީ ޕާޓްނަރޝިޕް ޕްރޮގްރާމް (އޯސީޕީޕީ)ގެ ފަންޑިންގ އާއެކު، ތެޔޮ ލީކުވުމުގެ ކުއްލި ހާލަތުގައި އަމަލުކުރާނެ ގޮތުގެ ތަމްރީން ޕްރޮގްރާމެއް ކުރިއަށް ގެންގޮސް ނިންމާލައިފިއެވެ.
މި މަހުގެ 5 އިން 16 އަށް ކުރިއަށް ގެންދެވުނު މި ތަމްރީނުގައި އެމްއެންޑީއެފްގެ 17 ސެއިލަރުންނާއި، ސްރީލަންކާ ކޯސްޓްގާޑުގެ 10 އޮފިސަރުންނާއި، އީޕީއޭ އަދި ތިމާވެށީގެ ވުޒާރާގެ މުވައްޒަފުން ބައިވެރިވިއެވެ. ޔޫކޭ ސަރުކާރުގެ ތިމާވެށި، ކާބޯތަކެއްޗާއި ގްރާމީ ކަންކަމާބެހޭ ޑިޕާޓްމަންޓާއި، ރާއްޖޭގައި ހުންނަ ބްރިޓިޝް ހައިކޮމިޝަނާ ގުޅިގެން ހިންގުނު މި ތަމްރީނުގައި، އައިއެމްއޯގެ ތިން ފެންވަރެއްގެ ތަމްރީނާއި، އިންސިޑެންޓް ކޮމާންޑް ސިސްޓަމްގެ ތިން ލެވެލްގެ އިތުރުން، ވައިގެ މަގުން ސަރަޙައްދު ބެލެހެއްޓުމާއި، ގޮނޑުދޮށް ސާފުކުރުމުގެ އެސެސްމަންޓް ޓެކްނިކްތައް ހިމެނެއެވެ.
ހުޅުމާލޭ މިނީ ސްޕޯޓްސް ކޮމްޕްލެކްސްގައި ބޭއްވުނު ނިންމުމުގެ ރަސްމިއްޔާތުގެ ޝަރަފުވެރި މެހެމާނަކީ ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމެވެ. އަދި މި ރަސްމިއްޔާތުގައި އީޕީއޭ އާއި ޑިފެންސް ކޯޕަރޭޝަން އެންޑް ޕޮލިސީގެ އިސް ވެރިންވެސް ބައިވެރިވެވަޑައިގެންނެވިއެވެ.
