ސޯޝަލް މީޑިއާއިން ގުޅުން ބަދަހިކުރުމާއި، މަޢުލޫމާތު ޙިއްޞާކުރުމާއި، މުވާޞަލާތުކުރުމުގެ ގޮތްތައް ބަދަލުކޮށްފައިވީ ނަމަވެސް، އެއަށް ދެވިހިފުމުން ޖިސްމާނީ އަދި ނަފްސާނީ ޞިއްޙަތަށް ނުރައްކާތެރި އަސަރުތަކެއް ކުރުވައެވެ. ލައިކާއި، ކޮމެންޓާއި، ނޯޓިފިކޭޝަންތަކުން ލިބޭ ޑޯޕަމިން އުފެދުމުގެ ސަބަބުން ބޭނުންކުރާ މީހުން އެއާ ގުޅިފައި ތިބެއެވެ. އަދި މިކަމުގެ ސަބަބުން ގިނަ ވަގުތު ސްކްރީނާ ކުރިމަތީގައި ހޭދަކުރެވެއެވެ. މިކަމުގެ ސަބަބުން އެކި ބާވަތުގެ ނޭދެވޭ އަސަރުތަކެއް ކުރެއެވެ.
ފުރަތަމަ ކަމަކީ، ގިނަ ވަގުތު ސޯޝަލް މީޑިއާ ބޭނުންކުރުމުގެ ސަބަބުން ކަންބޮޑުވުމާއި، ކަންފަތްކުރުމާއި، އެކަނިވެރިކަން ފަދަ ނަފްސާނީ މައްސަލަތައް ކުރިމަތިވެއެވެ. އެހެން މީހުންނާ އަބަދުވެސް އަޅާކިޔުމާއި، ސައިބަރ ފުރައްސާރަކުރުމާއި، އަދި ރީތިކޮށް ފެންނަ މީހާގެ އިމޭޖެއް ދެމެހެއްޓުމުގެ ޕްރެޝަރުގެ ސަބަބުން އަމިއްލަ ނަފްސަށް އިތުބާރު ގެއްލި، ނުކުޅެދުންތެރިކަމުގެ އިޙްސާސްތައް އުފެދެއެވެ.
ޖިސްމާނީ ގޮތުން، ސޯޝަލް މީޑިއާގެ ދެވިހިފުމުގެ ސަބަބުން ނިދުމުގެ ވައްޓަފާޅިތަކަށް ބަދަލު އަންނަ ފަށައެވެ. ސްކްރީން ކުރިމަތީގައި ގިނަވަގުތު ހޭދަ ކުރުމުގެ ސބަބުން މެލަޓޮނިން (އިންސާނާ ނިދަން އެހީވެދޭ ހޯމޯން އެއް) އުފެއްދުމަށް ހުރަސްއެޅި، ނިދަން އުނދަގޫވެއެވެ. އަދި މިކަމަށް ދެވިހިފާ މީހުން މީހުން ރޭގަނޑު ވަރަށް ލަހުން ވެސް ސްކްރޯލްކުރަމުން ދާ ތަން ފެނެއެވެ. މީގެ ސަބަބުން ވަރުބަލިވުމާއި، ޖެހިގެން އަންނަ ދުވަހު އުފެއްދުންތެރިކަން ދަށްވެއެވެ.
މީގެ އިތުރުން، ސޯޝަލް މީޑިއާއަށް ދެވިހިފުމުގެ ސަބަބުން ޙަޤީޤީ ދިރިއުޅުމުގެ ގުޅުންތަކަށް ހުރަސްއެޅެއެވެ. މީހުން ގިނަފަހަރު ބައްދަލުވެ ވާހަކަދެއްކުމުގެ ބަދަލުގައި މަޖާޒީ ގުޅުންތަކަށް އިސްކަންދޭން ފަށައެވެ. މީގެ ސަބަބުން އެކަހެރިވެ، އިޖްތިމާޢީ ގުޅުންތައް ބަލިކަށިވެއެވެ.
ވީމާ، ސޯޝަލް މީޑިއާއަކީ މި ޒަމާނުގައި ،މުހިއްމު އެއްޗެއްކަމުގައި ވިޔަސް މި ވަސީލަތްތައް ބޭނުންކުރުމުގައި ވަކި މިންގަނޑެއް ކަނޑައެޅުމަކީ މުހިއްމުކަމެކެވެ. އަދި ވަށައިގެން އުޅޭ މީހުން މިފަދަ މަންސަތަކަށް ދެވިހިފުމުގެ އަލާމާތްތަށް ފެންނަނަމަ މިކަން ހުއްޓުވުމަކީ ތިމާގެ ޒިންމާއެއް ކަމުގައި ބަލައިގެން ފިޔަވަޅު އެޅުމަކީ މުހިއްމު ކަމެކެވެ.
