ނިމިދިޔަ އޮކްޓޫބަރު މަހުން ފެށިގެން މިހާތަނަށް ބަލާއިރު ޓުއަރިޒަމް ސިނާއަތުގެ ސޭލްސް ރިޕޯޓްތަކަށް ބަލާއިރު ގާތްގަނޑަކަށް 40 މިލިއަން ޑޮލަރު ދިވެހި ބޭންކްތަކަށް މާރުކުރެވެން ވާނެކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ލަފާކޮށްފިއެވެ.
މިއީ ރިސޯޓުތަކަށް ލިބޭ އާމްދަނީން ދިވެހި ރުފިޔާއަށް ބޭންކުތަކުގައި މާރުކުރަން ލާޒިމުކުރާ ގަވާއިދުގެ ދަށުން މާރުކުރެވޭ އަދަދެކެވެ.
އެމްއެމްއޭއިން މަޢުލޫމާތު ދީފައިވާ ގޮތުގައި، ރާއްޖޭގައި ހުރި 175 ރިސޯޓުގެ ތެރެއިން 138 ރިސޯޓުގެ އޮކްޓޫބަރު މަހުގެ ސޭލްސް ރިޕޯޓު ލިބިފައިވާ ކަމަށާއި، 37 ރިސޯޓުގެ ސޭލްސް ރިޕޯޓު އަދި ލިބިފައިނުވާ ކަމަށް ވިދާޅުވެފައިވެއެވެ. މިހާތަނަށް ހުށަހަޅާފައިވާ ސޭލްސް ރިޕޯޓުތަކަށް ބަލާއިރު، 30 މިލިއަން ޑޮލަރާއި 40 މިލިއަން ޑޮލަރާ ދެމެދުގެ އަދަދެއް މާރުކުރެވޭނެ ކަމަށް ލަފާކުރެވޭ ކަމަށް އެމްއެމްއޭއިން ވިދާޅުވެފައިވެއެވެ. މިއީ ގާތްގަނޑަކަށް 617 މިލިއަން ރުފިޔާއެވެ.
މިހާރު އަމަލުކުރަމުންދާ ގަވާއިދުގެ ދަށުން، ކޮންމެ ޓޫރިސްޓަކަށް 500 ޑޮލަރުގެ މަގުން ޑޮލަރު މާރުކުރަން ޖެހެއެވެ. ނަމަވެސް، ރައްޔިތުންގެ މަޖިލީހުން ވަނީ މި ގަވާއިދަށް ބަދަލު ގެނެސް، ޓޫރިސްޓަކަށް 500 ޑޮލަރު ދެއްކުން އިޚްތިޔާރީކޮށް، އޭގެ ބަދަލުގައި އާމްދަނީގެ 20 ޕަސެންޓް މާރުކުރުމުގެ އިޚްތިޔާރު ލިބޭ ގޮތަށް ގާނޫނު ފާސްކޮށްފައެވެ. މި އައު ގާނޫނަށް އަމަލުކުރަން ފަށާނީ މި ޖެނުއަރީ މަހުން ފެށިގެންނެވެ.
