އަނބަކީ އަހަރެމެންގެ ތެރޭގައި އެެންމެ މަގުބޫލް އެއް މޭވާއެވެ. ހަމަ އެއާއިއެކު އަބަކީ އޭގައި ގިނަ ގުނަ ފައިދާތަކެއް އެކުލެވޭ އެއްޗެކެވެ. އެގޮތުން އަނބުގައި ގިނަ އަދަދަކަށް ވިޓަމިން އޭ ހުންނައިރު، ފޮތިކޮށް ކޮށާފައި ހުންނަ އަނބު ޖޯޑެއްގައި ދުވާލަކަށް ބޭނުންވާ ވިޓަމިން އޭގެ 25 އިންސައްތަ ހުރެއެވެ. ވިޓަމިން އޭއަކީ ލޮލުގެ ފެނުން ސާފުކޮށް ފެނުމަށް އެހީވެދޭ ވަރަށް މުހިންމު މާއްދާއެކެވެ. އޭގެ އިތުރުން އަނބުގައި ދަގަނޑުގެ ބައިގެ ހުރެއެވެ.އަދި ވިޓަމިން ސީ ހުރުމާއެކު، އޭގެ އެހީގައި ދަގަނޑު ހަށިގަނޑަށް ނެގުމުގައި އެހީތެރިވެދެއެވެ.
ރާއްޖޭގައި ޢާއްމުކޮށް ހައްދަނީ ފޮނި އަނބެވެ. މީގެ އިތުރަށް ބޮޑު އަނބާއި، އާވި އަނބު މަދުމަދުން ހައްދައެވެ. އަނބު ގަސް ގިނަ ކުރެވޭނީ އޮށް އިންދައިގެންނާއި، ވެލި ބަނދެގެންނާއި، ތަފާތު ގޮތްގޮތަށް ގްރާފްޓް ކޮށްގެންނެވެ.
އަނބު ގަސް ގްރާފްޓް ކުރުން: އަނބު ގަސް ގްރާފްޓް ކުރުމަކީ ފޯދިފައިވާ އަނބުގަހުގެ ގޮފިކޮޅެއް ނުވަތަ އެހެން ބައެއް، އެ ގޮފިކޮޅު ނުވަތަ އެބަޔަކާ އެއް ފަލަމިނުގެ އެހެން ކުޑަ އަނބު ގަހަކާ ގުޅުވުމެވެ.
ގްރާފްޓް ކުރުމުން ގަސް ފޯދުން އަވަސް ވެފައި މައި ގަހާއި ވަރަށް އެއްގޮތްވާނެއެވެ.
މުޑުވައްކުރުން:
އަނބު އޮއް އިންދައިގެން މުޑުވައް ކުރާނަމަ 1 ފޫޓް ފުންމިނުގައި ވަޅުގަނޑެއް ކޮނެ ވަޅުގަނދުގެ ފަސްގަނޑު ޖަހާށެވެ. ދެން ބަލި ނުޖެހޭ ރަގަޅަށް ހެދޭ ގަހަކުން ރަގަޅަށް ދޮންވެފައިހުންނަ އަނބުއޮއް ހޯދާފައި ތައްޔާރުކުރި ވަޅުގައި އިންދާށެވެ.
· އޮއް އިންދާނީ 6 އިންޗި ދުރުމިނުގައެވެ ފޮށިގަނޑެއް، ނުވަތަ ބާލިދީއެއްގެ ތެރޭގައިވެސް އަނބު އޮއް މުޑުވަށް ކުރެވިދާނެއެވެ. މިފަދަ އެއްޗެއްގައި މުޑުވަށް ކުރާނަމަ އެންމެ ރަގަޅީ ކޮތަޅުގައި އިންދުމެވެ. އޮށުންފަޅާ ގަސް ދޮޅު ފޫޓަށް ހެދުމުން އެހެރީ ރުވާވަރުވެފައެވެ.
· ގްރާފްޓްކޮށްފައިވާ ގަސްރުވާނަމަ ގާތްގަނޑަކަށް ދޮޅު ފޫޓްގެ ގަސް ހޯދާށެވެ.
ވަޅު ތައްޔާރުކުރުން:
ފެންތިލަ ބިންބިމުގައި އަނބު ހައްދާނަމަ އަނބު އިންދަން ވަޅުކޮންނާނީ 2X2 ފޫޓް ބޮޑު މިނުގައި 1 ފޫޓް ފުންމިނުގައެވެ. ވަޅު ކޮންނާނީ މަތީގައި ހުންނަ ކަޅުފަސް ވަކިން ނެގުމަށްފަހުގައެވެ. މި ފަސް ކާދާއި އެއްކުރުމަށްފަހު ކޮނުނު ވަޅުގެ ތެރެއަށް އަޅައި ފުރާލާށެވެ. ވަޅު ތައްޔާރު ކުރާނީ އަވި ލިބޭ ހާމަ ބިމެއްގައެެވެ. ވަޅާ ދިމާމަތިން ކައިރީގައި ހެދިފައިވާ ގަސްތަކުން މަތި ނުބެދޭ ތަނެއްގައެވެ.
ފެން ފުން ތަންތަނުގައި ވަޅު ކޮންނާނީ 3 ފޫޓް 3 ފޫޓް ބޮދުމިނުގައި، ފުންމި، ފެނާ ޖެހެންދެނެވެ. މި ފަދަ ވަޅުތަކުގައިވެސް އޮއް އިންދަންވާނީ ކުނިބުންޔާ ކަޅުފަސް އަޅާ، މަދުވެގެން 6 މަސް ވަންދެން ބެހެއްޓުމަށް ފަހުއެވެ. އަދި ގަސް ނުވަތަ އޮއް އިންދާނީ ބިމާ ހަމައަށް ކަޅުފަސް އަޅައި ވަޅު ފުރާލުމަށްފަހު މައްޗަށް މައްޗަށް ކާދު އަޅާ އެއްކުރުމަށްފަހުއެވެ.
އިންދުމާއި ބެލެހެއްޓުން
ތައްޔާރު ކުރި ވަޅުގަނޑުގައި ގަސް އިންދުމަށްފަހު، ގަސް ރޯ ވަންދެން ކޮކާ އަވި ލިބޭގޮތަށް ގަސް ހިޔާކުރަން ވާނެއެވެ. ވާރޭ ނުވެހޭނަމަ ދުވާލަކު ދެއިރު ފެން ދޭންވާނެއެެވެ.
ގްރާފްޓް ކޮށްފައި ވާ ގަހެއްނަމަ ގްރާފްޓް ކުރި ހިސާބަށް ވުރެން ތިރިން ހެދޭ ކުރިތައް ތޫނު ވަޅިއަކުން ބުރިކުރަން ވާނެއެވެ. ގަސް ހެދެން ފެށުމުން ކޮންމެ ދެ މަހަކު އެއްފަހަރު ގަސްވަށައިގެން ގަސް ކާނާ އެޅުމުން ގަސް ހެދުމަށް އަވަސްވެއެވެ. އަދި ގަހުިގެ ގޮފިތައް ގިނަވުމުން ވާކޮށް ހުންނަ ގޮފިތައް ކޮށުމުންވެސް ގަސް ހެދިބޮޑުވުމަށް އަވަސްވެއެވެ.
ގަސް ފޯދުން
ރަނގަޅަށް ހެދޭނަމަ ގްރާފްޓް ކޮށްފައިވާ އަނބު ގަސް އިންދާތާ ތިން އަހަރު ނުވަތަ ހަތަރު އަހަރުގެ ތެރޭގައި ފޯދޭނެއެވެ.
އޮއް އިންދައިގެން ހައްދާގަސް ފޯދުމަށް 6 އަހަރާއި 10 އަހަރާއި ދެމެދުގެ މުއްދަތެއް ހޭދަވެއެވެ.
އަނބަކީ އަހަރެމެންގެ ތެރޭގައި ވަރަށް މަގުބޫލު މޭވާ އެކެވެ. އެގޮތުން އަނބުގެ ހުރިހާ މަރުހަލާއެއްގައިވެސް ބޭނުން ހިފޭނެ ޑިމާންޑް ބޮޑު މޭވާ އެކެވެ. އެހެންކަމުން އަނބު ހެއްދުމަށް އަހަރެމެންގެ ތެރެއިން ގިނަ ބަޔަކު ވަރަށް މަސައްކަތް ކުރެއެވެ. އެހެން ކަމުން މި ލިޔުމުގައި އެކުލެވިގެންވާ މައުލޫމާތުން، އަނބު ގަސް ހައްދަން ބޭނުންވާ ފަރާތްތަކަށް ވަރަށް މުހިންމު މައުލޫމާތުތަކަކަށް ވާނޭކަމާއި މެދު ޝައްކެއްނެތެވެ.
https://sarukaaru.gov.mv/articles/6703
