މި އަހަރުގެ މޯލްޑިވްސް މެރިން އެކްސްޕޯގެ ސްޕޮންސަރަކަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވެއްޖެއެވެ.
މޯލްޑިވްސް މެރިން އެކްސްޕޯ ބޭއްވުމަށް ހަމަޖެހިފައިވަނީ ފެބްރުއަރީ މަހުގެ 6 އިން 9 އަށް ހުޅުމާލޭ ސެންޓްރަލް ޕާކުގައެވެ. 10 ވަނަ ފަހަރަށް ބޭއްވޭ މި އެކްސްޕޯގައި އައު އީޖާދުތަކާއި، ދެމެހެއްޓެނިވި ގޮތްތަކާއި އަދި އެކި ފަރާތްތަކުގެ އެއްބާރުލުން ފެންނާނެ ކަމަށް ބެލެވެއެވެ. މި އަހަރުގެ އިވެންޓުގައި އަލިއަޅުވާލާނީ ދޯނިފަހަރާއި ދޯނި ހެދުމާއި، ކަނޑުގެ ސްޕެއަރ ޕާޓްސްތަކާއި، މެޝިނަރީ، މަސްވެރިކަމުގެ ސާމާނާއި، ޑައިވިންގ އަދި ވޯޓަރ ސްޕޯޓްސް ސާމާނާއި، ކަނޑުގެ ކަންކަމާ ގުޅުންހުރި އެހެނިހެން ޚިދުމަތްތަކަށެވެ.
މޯލްޑިވްސް މެރިން އެކްސްޕޯއަކީ ކަނޑާ ގުޅުންހުރި ވިޔަފާރިތަކަށް އެ ފަރާށް އެ ފަރާތްތަކުގެ އުފެއްދުންތަކާއި ޚިދުމަތްތައް ދެއްކުމަށް ބާއްވާ ބައިނަލްއަޤްވާމީ އިވެންޓެކެވެ. މީގެ އިތުރުން، މި އިވެންޓަކީ ރާއްޖޭގައި އެންމެ ގިނަ ދުވަހު ކުރިއަށްދާ އަދި އެންމެ ބޮޑު އެއް އިވެންޓު ކަމުގައިވެސް ފާހަގަކުރެވެއެވެ.
މި އެކްސްޕޯގައި ބައިވެރިވާ ފަރާތްތަކަށް ކަނޑާ ގުޅުންހުރި އެކި ދާއިރާތަކުގެ އެންމެ ފަހުގެ ޓެކްނޮލޮޖީތަކާއި އުފެއްދުންތައް ބެލުމުގެ ފުރުސަތު ލިބޭނެއެވެ. އަދި މި ދާއިރާގައި މަސައްކަތްކުރާ އެކި ފަރާތްތަކާ ބައްދަލުކޮށް ގުޅުން ބަދަހިކުރުމުގެ ފުރުސަތުވެސް ލިބިގެންދާނެއެވެ.
