ރާއްޖޭގައި ހުއްދަނެތި ފާލުބެލުމުގެ މަސައްކަތުގައި އުޅުނު އިންޑިއާގެ 3 މީހަކު ހައްޔަރުކޮށް، އެމީހުން ޑީޕޯޓުކުރުމުގެ މަސައްކަތް ފަށައިފިކަމަށް މޯލްޑިވްސް އިމިގްރޭޝަނުން މިއަދު ހާމަކޮށްފިއެވެ.
އިމިގްރޭޝަނުން "އެކްސް" މެދުވެރިކޮށް ހާމަކުރި ގޮތުގައި މި ތިން މީހުން ހައްޔަރުކޮށްފައިވަނީ އިއްޔެ ހިންގި އޮޕަރޭޝަނެއްގައެވެ. މި އޮޕަރޭޝަން ހިންގާފައިވަނީ މޯލްޑިވްސް ޕޮލިސް ސަރވިސްއާ ގުޅިގެންނެވެ. މިހާރު މި ތިން މީހުން ތިބީ އިމިގްރޭޝަންގެ ބެލުމުގެ ދަށުގައެވެ.
ހައްޔަރުކުރެވުނު މީހުންގެ ތެރޭގައި ހިމެނެނީ 18 އަހަރުގެ ދަނަންޖޭ ބައިލަޕަތީ އާއި، 39 އަހަރުގެ ނާގަރާޖަ ބައިލަޕަތީ އާއި، 25 އަހަރުގެ ސްރީހަރިވަނަމް އެވެ.
މި މައްސަލައާ ގުޅިގެން، "މާސްޓާ ދުރްގާ ގުރޫޖީ" ނަމަކަށް ކިޔާ ޕޭޖެއް މެދުވެރިކޮށް ރާއްޖޭގައި ފާލުބެލުންފަދަ ކަންކަން ކުރާކަމުގެ މަޢުލޫމާތު ފެތުރިފައިވާތީ، އެކަމާ ގުޅޭގޮތުން މައްސަލަ ބަލަމުންދާ ކަމަށް ފުލުހުން އިއްޔެ ވަނީ ވިދާޅުވެފައެވެ.
