ޕާސްޕޯޓާއި އައިޑީކާޑު ޕްރިންޓު ކުރުމުގެ ޚިދުމަތް ރ. އުނގޫފާރުގައި ފަށައިފިއެވެ.
މި ޚިދުމަތްތައް އިފްތިތާހުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރ. އަތޮޅަށް ކުރައްވާ ރަސްމީ ދަތުރުފުޅުގައި، އުނގޫފާރުގެ ރައްޔިތުންނާ ބައްދަލުކުރެއްވުމަށް ބޭއްވުނު ރަސްމީ ޖަލްސާއެއްގައިއެވެ. މި ޖަލްސާގައި ދާޚިލީ ސަލާމަތާއި ރައްކާތެރިކަމާ ބެހޭ ވަޒީރު އަލީ އިހުސާން އަދި އިމިގްރޭޝަންގެ ޑެޕިއުޓީ ކޮންޓްރޯލަރ، އަހުމަދު އަޝްފާން ވަނީ ބައިވެރިވެވަޑައިގެންފައެވެ.
މި ޚިދުމަތް ފެށުމާއެކު، މިއަދުން ފެށިގެން "އިމުގާ" މެދުވެރިކޮށް ހުށަހަޅާ ޕާސްޕޯޓުތައް އުނގޫފާރުން ނެގުމުގެ އިންތިޒާމް ހަމަޖެހިފައިވާ ކަމަށް މޯލްޑިވްސް އިމިގްރޭޝަނުން މަޢުލޫމާތު ދީފައިވެއެވެ.
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ރައްޔިތުންނާ ގާތުން، އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރެއްވުމަކީ ރައީސް މުޢިއްޒުގެ ވައުދުފުޅެކެވެ. މި ސިޔާސަތުގެ ދަށުން މި ޚިދުމަތް މުޅި ރާއްޖެއަށް ފުޅާކުރެއްވުމުގެ މަސައްކަތް މިދިޔަ ނޮވެމްބަރުމަހުގެ 16 ވަނަ ދުވަހު ވަނީ އިފްތިތާޙްކުރައްވާފައެވެ.
މިހާތަނަށް މާލެ ސިޓީގެ ހުރިހާ ސަރަޙައްދެއްގެ އިތުރުން ހދ. ކުޅުދުއްފުށި، ދ. ކުޑަހުވަދޫ، ގއ. ވިލިނގިލި، ލ. ފޮނަދޫ އަދި މިހާރު ރ. އުނގޫފާރުން ޕާސްޕޯޓު ދޫކުރުމުގެ ޚިދުމަތް ދެމުންގެންދެއެވެ. އަދި ދިވެހި ރައްޔިތެއްކަން އަންގައިދޭ ކާޑުގެ ޚިދުމަތް މާލެ ސިޓީގެ ހުރިހާ ސަރަޙައްދެއްގެ އިތުރުން ހދ. އަތޮޅަށްވެސް މިހާރު ވަނީ ފުޅާކޮށްފައެވެ.
ސަރުކާރުން ވަނީ ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމުގެ މަގުޗާޓުވެސް އާންމުކުރައްވާފައެވެ. މި މަގުޗާޓުގައިވާގޮތުން މިއަހަރުގެ ނިޔަލަށް ކޮންމެ ސިޓީއަކާއި އަތޮޅެއްގައިވެސް ކަނޑައެޅޭ ވަކި ސަރަޙައްދުތަކުގައި މި ޚިދުމަތްތައް ޤާއިމުކުރުމަށް ވަނީ ނިންމާފައެވެ.
