މިހާރު މޮނިޓަރިންގެ ހާލަތުގައި އޮތް ދ. ކުޑަހުވަދޫގައި އުޅުމަށްފަހު މިދިޔަ ފެބްރުއަރީ މަހުގެ 26 ވަނަ ދުވަހުގެ ފަހުން އެހެން ރަށަކަށް ގޮސްފައިވާ ފަރާތްތައް އަންގައިދިނުމަށް ހެލްތު ޕްރޮޓެކްޝަން އެޖެންސީއިން އެދިއްޖެ އެވެ.
އެޗްޕީއޭއިން ބުނީ އެ ތާރީހުގެ ފަހުން ކުޑަހުވަދުއިން އެހެން ރަށަކަށް ގޮސްފައިވާ ފަރާތްތަކުން އަންގަންޖެހޭނީ އެ ރަށެއްގެ ހޮސްޕިޓަލް ނުވަތަ ހެލްތު ސެންޓަރަަކަށެވެ.
އެ ތާރީހުގެ ފަހުން ކުޑަހުވަދުއަށް ދިއުމަށްފަހު، އަނބުރާ އެހެން ރަށަކަށް ދިޔަ ފަރާތްތަކުން 14 ދުވަހުގެ މުއްދަތަކަށް ކަރަންޓީން ވުމަށްވެސް އެޗްޕީއޭއިން ވަނީ އެދިފަ އެވެ.
ހަމައެހެންމެ އެ ތާރީހުގެ ފަހުން ކުޑަހުވަދުއިން މާލެއަށް އައިސްފައިވާ ފަރާތްތަކުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް ނުވަތަ ވިލިމާލެ ފްލޫ ކްލިނިކުން ސާމްޕަލް ނެގުމަށްވެސް އެޗްޕީއޭއިން އެދިފައިވެ އެވެ.
ކުޑަހުވަދޫ އެއާޕޯޓުގައި މަސައްކަތްކުރާ ހަ މީހެއްގެ ކިބައިން ކޮވިޑްގެ އަލާމާތްތައް ފެނިގެން ނެގި ސާމްޕަލްތައް މިއަދު ކޮވިޑަށް ޕޮޒިޓިވްވުމުން އެރަށުގައި މި ބަލި ފެތުރިފައިވާ ކަމުގެ ބިރު އެބައޮތެވެ.
