ބޮލީވުޑްގެ ތަރި ފާތިމާ ސަނާ ޝެއިޚް ވެސް ކޮވިޑަށް ޕޮޒިޓިވް ވެއްޖެއެވެ. މިވަގުތު އޭނާ ހުރީ ހޯމް ކަރަންޓީންގައިއެވެ.
ސަނާ މި ވާހަކަ ހިއްސާކޮށްފައިވަނި އިންސްޓަގްރާމް މެދުވެރިކޮށެވެ. އޭނާ ބުނެފައި ވަނީ އޭނާ ދަނީ ހުރީހާ ސޭފްޓީ ޕްރޮޓޮކޯލްތަކަށް ތަބާވަމުން ކަމަށެވެ. އަދި އެންމެން ވެސް ރައްކާތެރިވުމަށް އޭނާވަނީ އިލްތިމާސް ކޮށްފައެވެ.
މީގެ ދުވަސްތަކެއް ކުރިން ކާތިކް އާރިޔަން އާއި ރަންބީރް ކަޕޫރާއި، އާމިރު ޚާން ފަދަ ބޮލީވުޑްގެ މަޝްހޫރު ތަރިން ވަނީ ކޮވިޑަށް ޕޮޒިޓިވް ވެފަ އެވެ.
ސަނާ ވަނީ ޑަންގަލް، ތަގްސް އޮފް ހިންދުސްތާން އަދި ލުޑޯ ފަދަ ފިލްމު ތަކުން ފެނިގެން ގޮސްފައިއެވެ.
ސަނާގެ ކުރިއަށް ހުރި ފިލްމު ތަކުގެ ތެރޭގައި ބޫތު ޕޮލިސް ހިމެނެއެވެ. މި ފިލްމުން ސަނާގެ އިތުރުން ސައިފް އަލީ ޚާން، އަލީ ފަޒަލް އަދި ޔާމީ ގޯތަމް ފެނިގެން ދާނެއެވެ.
އަޖީބް ދާސްތާންސް އަކީ ވެސް ސަނާގެ ކުރިއަށް އޮތް ފިލްމެކެވެ. މި ފިލްމުން ސަނާއާއެކު ނުޝްރަތު ބަރުޗާ، ޖެއިދީޕް އަހުލަވަތު، އަދިތީ ރާއު ހައިދަރި އަދި މިނޫންވެސް އިތުރު ތަރިން ފެނިގެންދެއެވެ.
އަޖީބް ދާސްތާންސް މިއަހަރު އެޕްރިލް މަހުގެ 16 ވަނަ ދުވަހު ރިލީޒްކުރަން ހަމަޖެހިފައިވާއިރު ބޫތު ފޮލިސް ރިލީޒްކުރަން ހަމަޖެހިފައިވަނީ ސެޕްޓަމްބަރު މަހުގެ ދިހަ ވަނަ ދުވަހެވެ.
