ރަޝިޔާއިން ދޮޅު ލައްކަ ސިފައިން ޔުކްރެއިން ގެ ބޯޑަރަށް ޖަމާކޮށްފި ކަމަށް ވިލާތު އިއްތިހާދުގެ ޚާރިޖީ ސިޔާސަތާ ބެހޭ ވެރިޔާ ކަށަވަރު ކޮށްދެއްވައިފިއެވެ. މިއީ ޔޫކްރެއިން ކައިރިއަށް ރަޝިޔާއިން މިހާގިނަ އަދަދެއްގެ ސިފައިން ޖަމާ ކުރި ފުރަތަމަ ފަހަރެވެ.
އީޔޫ ފޮރިން ޕޮލިސީ ޗީފް ޖޯސެފް ބޮރެލް ، ޔޫކްރެއިން ގެ ޚާރިޖީ ވަޒީރާއެކު ވާހަކަ ދެއްކެވުމަށްފަހު ވިދާޅުވީ ރަޝިޔާގެ މިއަމަލުން ބޮޑު ހަމަނުޖެހުމަކަށް ފުރުސަތު އޮތް ކަމަށެވެ.
ކްރެމިއާގެ ދެކު އައްސޭރިފަށުގައި ރަޝިޔާއިން ޖަމާކޮށްފައިވާ ސިފައިން އެތަނަށް ޖަމާކޮށްފައި ވަނީ މިދިޔަ މަސްދުވަސްތެރޭގައި ކަމަށް ލަފާ ކުރެވެއެވެ.
ޕްލަނެޓް ލެބްސްގެ ސެޓެލައިޓުން މިމަހުގެ 13 ވަނަ ދުވަހު ނަގާފައިވާ ފޮޓޯތަކުން ފެންނަނީ، އެއްހާސް އުޅަނު ޖަމާކޮށް ފޭލިގެތައް ޖަހާފައިވާ ތަނެވެ.
ރަޝިޔާއިން ބުނާ ގޮތުގައި ނޭޓޯއިން ރަޝިޔާއަށް ނުރައްކާ ކުރާތީ ރަޝިޔާއިން ސަރަހައްދުގައި އަސްކަރީ ތަމްރީންތައް ބާއްވަނީ ކަމަށެވެ.
ރަޝިޔާއިން ކްރީމިއާ ހިފައި، ރަޝިޔާގެ ތަނެއްގެ ގޮތުގައި ހަމަޖެއްސީ 2014 ގައެވެ. ދުނިޔޭގެ ގިނަ ގައުމުތަކުން ރަޝިޔާގެ މި އުދުވާނީ އަމަލު ބަލައެއް ނުގަނެއެވެ. މުސްލިމުންގެ އާބާދީ ގިނަ ކްރީމިއާގެ މުސްލިމުން ރަޝިޔާއިން ވަނީ ތާރީޚްގެ އެކި ފައްތަރުގައި ބޭރުކުރަމުން އެތާނގައި ރަޝިޔާ މީހުން ވަޒަންވެރި ކުރަމުން ގޮސް މުސްލިމުން ބައިމަދު ބަޔެއްގެ ގޮތުގައި ހަމަޖައްސާފައެވެ.
