ބޮލީވުޑްގެ ރީތި ބަޠަލާ އާލިޔާ ބަޓް އާއި މަޝްޙޫރު ފިލްމީތަރި ރަންބީރު ކަޕޫރު އިއްޔެގެ ވަގުތެއްގައި ޗުއްޓީހޭދަ ކުރުމަށްދިވެހިރާއްޖެ އަތުވެއްޖެއެވެ.
މިއީ އާލިޔާ ބަޓް މި އަހަރު ދިވެހިރާއްޖެ އައި ދެވަނަ ފަހަރެވެ. މިއަހުރުގެ ކުރީކޮޅުވެސް އާލިޔާ އޭނާގެ ރަޙުމަތްތެރިންނާއެކު ދިވެހިރާއްޖޭގައި ޗުއްޓީހޭދަ ކޮށްފައިވެއެވެ.
އާލިޔާއާއި ރަންބީރު އާއި ދެ ތަރިންވެސް މިއަހަރު ކޮވިޑް 19 އަށް ފައްސި ވިއެވެ. ރަންބީރު މަޗް މަހު މި ބަލިން ރަނަގަޅުވި އިރު އާލިޔާ ނައްސިވިކަން ހާމަކޮށްފައި ވަނީ މީގެ ކުޑަ ދުވަސްކޮޅެއް ކުރިންނެވެ.
އާލިޔާ އާއި ރަންބީރު ކަޕޫރަކީ ހިންދީ ފިލްމު އިންޑަސްޓްރީގެ މަޤުބޫލު ދެ އާއިލާއަކަށްނިސްބަތްވާ، އެ އިންޑަސްޓްރީގެ މަޝްޙޫރު ދެ ތަރިންނެވެ. މި ދެތަރިންގެ ކައިވެނި 2020 ގައި ކުރެވޭނެ ކަމަށްވެސް ކުރިން އިއުލާނުކޮށްފައި ވެއެވެ. ނަމަވެސް ކޮވިޑް 19 ގެ ބަލި މަޑު ކަމާއި އެކު މި ކައިވެނި ވަނީ ފަސްކުރއެވިފައެވެ.
ކޮވިޑް 19 ގެ މި ބަލިމަޑު ކަމުގައިވެސް ދިވެހިރާއްޖެއަށް ޗުއްޓީހޭދަކުރުމަށް އަންނަ ފަންނާނުން ވަރަށް ގިނައެވެ. ޚާއްޞަކޮށް އިންޑިއާގެ މަޝްޙޫރު ފިލްމީތަރިން ފާހަގަ ކޮށްލެވެއެވެ.
އެގޮތުން މީގެ ކުޑަ ދުވަސްކޮޅެއް ކުރިން ދިޔާ މިރުޒާ އޭނާގެ ހަނީމޫނަށް ދިވެހިރާއްޖެ އައިސްފައިވެއެވެ. އަދި ޝަރުދާ ކަޕޫރުވެސް އޭނާގެ އާއިލާއާއެކު ޗުއްޓީގެ ދުވަސްތައް ނިންމާލުމަށްފަހު ދިވެހިރާއްޖެއިން ފުރީ ވަރަށްފަހުންނެވެ.
މި ހުރިހާތަރީންވެސް ދިވެހިރާއްޖޭގައި ހޭދަ ކުރާ ޗުއްޓީގައި ރާއްޖޭގެ ރީތި ގޮނޑުދޮށްތަކާއި މޫދާއި ދިވެހިރާއްޖޭގެ ޖަޒީރާ ރަށްތަކުގެ ރީތި ފޮޓޯތައް ހިއްސާ ކުރެއެވެ. މި ފޮޓޯތަކަށް ވރަށް ގިނަ ފަރާތްތަކެއްގެ ތަރުޙީބު ލިބެއެވެ.
