ސްރީލަންކާގެ ޕާލަމެންޓްގެ މެމްބަރުން ކޮލޮމްބޯ ޕޯޓް ސިޓީއަށް ދިރާސާ ދަތުރެއްގައި ދިއުމަށް ކޮޅުނބުގައި ހުންނަ ޗައިނާ އެމްބަސީން ދައުވަތު ދިނުމުން އިދިކޮޅު މެންބަރުން މައްސަލަ ޖައްސައިފިއެވެ. އިދިކޮޅު މެމްބަރުން ސުއާލުކޮށްފައި ވަނީ ކޮލޮމްބޯ ޕޯޓް ސިޓީއަށް ދިއުމަށް ގައުމުގެ ޕާލަމެންޓްގެ މެންބަރުންނަށް ދައުވަތު ދިނުމަށް ޗައިނާ އެމްބަސީއަށް ލިބިގެންވަނީ ކޮން ހައްގެއް ހެއްޔެވެ؟
ފަހުން ޗައިނާ އެމްބަސީން އެމްޕީންނަށް ފޮނުވި އެސްއެމްއެސްގައި ބުނެފައި ވަނީ ކޮލޮމްބޯ ޕޯޓް ސިޓީއަށް ހަމަޖައްސާފައި އޮތް ސްޓަޑީ ޓުއަރ މިހާރު ފަސް ކުރެވިފައިވާ ކަމަށެވެ.
ޕާލަމެންޓްގެ އިދިކޮޅު މެމްބަރު ހަރްޝަނާ ރާޖަކަރޫނާ ވިދާޅުވީ ނިމިދިޔަ ސަރުކާރުގައި ކޮލޮމްބޯ ޕޯޓް ސިޓީއަށް ދަތުރުތައް ހަމަޖައްސައި ދިނުމުގައި އުޅުނީ އަރބަން ޑިވެލޮޕްމެންޓް އޮތޯރިޓީން ކަމަށެވެ. އަދި ޗައިނާ އެމްބަސީންނެއް ނޫން ކަމަށެވެ.
އެމްޕީ ވިދާޅުވީ، ސްރީލަންކާގެ އަމިއްލަ ފަސްގަނޑުގައި ސްރީލަންކާއަށް ސިޔާދަތު އޮންނަ ތަނަކަށް ސްޓަޑީ ޓުއަރއަށް އެމްޕީން ގެންދިއުމުގައި ޗައިނާ އެމްބަސީއަށް ލިބިގެންވަނީ ކޮން ބާރެއް ހެއްޔެވެ؟ އަދި ޕާލަމެންޓްގެ ރައީސް މިމައްސަލަ ބައްލަވައި ދެއްވުމަށްވެސް އެމްޕީ ވަނީ އެދިވަޑައިގެންފައެވެ.
